No laga nos purba tapa solo cu un dede, ni haci manera bo no ta mira cu e caminda cu bo yiu ta bay aden no ta e mihor caminda.
Nos mester ta atento pa coregi , disiplina y instrui nos yiu den caminda di Dios.
Tin hopi caso di problema di salud mental serca mayor, cu ta profundamente bao di stress y depresion, cu ta causa door di nan propio yiu, simplemente e mucha of hoben no kier reconoce cu e tin bandona e bida di bagamundo, biba drechi pa asina su mayornan por tin goso cune.
Den e buki di 1 Samuel 1:12 ta para scirbi:Awor e yiu hombernan di Eli tabata hombernan perverso, nan no tabata conoce Senjor. Nan tabata haci maldad entre otro nan tabata drumi cu muhernan cu tabata sirbi den tempel, nan tabata kita e carni for di e sacerdote nan , nan tabata menosprecia e ofrenda di Senjor y nan maldad tabata grandi dilanti di Senjor.
Eli a papia cu su yiunan, pa nan stop di haci cosnan asina, y hasta duna nan un comparacion bisando: Si un hende haci pica contra un otro Dios lo intermedia pe,ma si un hende haci pica contra Dios, ken lo intercede pe?( 1 Samuel 1:25) Ma e hobennan no a scucha e bos di nan tata, pasobra Senjor kier a mata nan. ( Nan tabata malbado y perverso).
Despues Dios mes a manda un profeta pa profetisa na Eli cu su dos yiunan Ofni y Finees lo muri riba mes un dia (Samuel 1:2:34), y esey a sosode , ora Israel a perde bataya dilanti di filisteonan, e dos yiunan a muri y e arka di Dios a wordo captura.
Awendia tin hopi mucha, hoben y homber grandi cu te ainda ta biba den cas di nan mayornan cu mal comportacion y faltando respet gravemente.
Tin di nan hasta ta manipula y menasa, y mayornan cu ta grandi caba, ta sufriendo di presion halto, sucu etc, y nan salud mental ta wordo afecta pa falta di pas y trankilidad.
Hoben cu ta cay sera, sali bek bolbe cay sera, pasobra droga cu arma, y dominio cu placa tin den nan bida, cu nan ta haci tur sorto di bagamunderia pa hanja placa, y nan ta lubida cu nan mayornan ta sufri.
Pa motibo di hobennan rebelde cu malconducta, mayornan ta hanja nan ta bishita prison cu awa na wowo, pasobra yiu ta keda yiu.
Tambe tin mucha muher cu nan conducta ta laga hopi di desea, cu ni maske con bon nan mama ta papia cu nan, nan tin tur cos, pero nan ta mara na droga y nan ta biba cu homber iresponsabel cu ta maltrata nan y nan mayornan ta sufri e consecuencia di nan comportacion.
Tanto Exodus 20:12 como Efesionan 6:2 ta hala atencion di yiunan cu nan mester honra nan tata y nan mama.
E situacion berdaderamente ta alarmante, pasobra locual e hobennan aki ta haci, ta demostra cu nan no tin cunes ken ta sufri , y ken ta bira malo, y hasta tin e posibilidad, cu nan ta causa di un atake di curason pa nan mayor, cu consecuencia doloroso pa tur hende.
Tur hoben mester sa locual e palabra di Dios ta bisa den Romanonan 2:5; Pa motibo di bo capricho y bo curason cu no ta arepenti, bo ta montona furia pa bo mes den e dia di furia y revelashon di e huicio husto di Dios.Kende lo paga cada ken segun su obranan.
Pesey yuinan mester honra nan tata y nan mama.( Efesionan 6:1-4).
Sinceramente, Pastor Marcel Balootje
