Minister Gerlien Croes como minister di Deporte a realisa un bishita oficial na oficina di IBiSA (Instituto Biba Saludabel y Activo), den marco di un encuentro di introduccion y fortalecemento di cooperacion. E reunion a brinda oportunidad valioso pa establece laso directo cu e team di IBiSA y pa dialoga tocante temanan clave relaciona cu e desaroyo di deporte, salud y movecion na Aruba.
Durante e conversacion, a trata aspectonan importante di e organisacion, incluyendo su formacion y e cambionan structural cu ta tumando luga actualmente, su vision y rol fundamental den e desaroyonan aki. Minister Gerlien Croes y e team di IBiSA a papia abiertamente riba temanan urgente, como tambe proyectonan importante cu ta bay implementa of ta den ehecucion caba.
Minister Croes a expresa su reconocemento pa e trabao continuo y e compromiso firme cu IBiSA ta demostra pa cumpli cu su mision: lanta un comunidad activo, saludabel y un Aruba cu ta pone bienestar fisico y mental di su ciudadanonan na e centro di su desaroyo.
“Cada encuentro ta un paso mas cerca pa nos logra un Aruba cu ta crece, siña y briya hunto. E colaboracion entre Gobierno di Aruba y IBiSA ta esencial pa promove un estilo di bida saludabel, inclusivo y sostenibel, for di nos muchanan te cu nos adultonan mayor”, Minister Croes a destaca.
E reunion a caba den un ambiente positivo y constructivo, cu ambicion renoba pa traha hunto riba proyecto y iniciativanan cu ta rebiba movemento, salud, union y deporte den nos bario y scolnan.
Pa un futuro di Aruba cu ta crece hunto, cu energia, pasion y direccion!
