Miembro di Parlamento Evelyn Wever-Croes a presenta awe algun pregunta por escrito na e minister di Finansa y Asunto Economico tocante e retraso den e entrega di un conseho di CAft (College Aruba financieel toezicht) riba e plan pa instala un instalacion nobo pa purificacion di awa di riool (RWZI).
E conseho di CAft ta fecha 3 di april 2025, pero apenas awe — despues di dos luna — el a wordo comparti cu Parlamento di Aruba, apesar di varios peticion di e fraccion di MEP. “E tardansa aki no ta aceptabel y no ta digno di un gobernacion cu ta bisa di ta aplica bon gobernacion,” segun Wever-Croes.
Den e documento, CAft ta duna dos recomendacion na e gobierno nobo:
- Cu Aruba Wastewater Strategic Solutions N.V. (AWSS) mester wordo conta como parti di e sector colectivo;
- Cu e ley di Corporate Governance mester wordo introduci pronto.
Wever-Croes ta pidi claridad di parti di e minister riba e posicion di e gobierno tocante e dos recomendacionnan aki. E ta pidi tambe pa un aclaracion tocante e mecanismo di supervision cu CAft ta considera no suficiente. “Durante e gabinete anterior nos a tuma paso pa mehora e corporate governance y pa harmonisa e corporate governance codes den e sector aki. Mi kier sa na cua punto exacto CAft ta considera cu e supervision no ta suficiente,” segun e parlamentario.
CAft ta menciona tambe cu Aruba awor tin suficiente espacio den e presupuesto pa cubri un gran parti di e inversion pa RWZI. Wever-Croes kier sa kico ta e posicion oficial di e gobierno riba esaki. E ta pidi ademas pa un update riba e negociacionnan riba e ley di Reino pa finansa publico sostenibel, cu segun CAft por habri e porta pa AWSS pa haya un prestamo cu un suma di interes mas abou.
E conseho a causa hopi conmocion publico durante e ultimo simannan, despues cu un medio a indica cu e conseho, supuestamente secreto, ta pidi un investigacion contra miembronan di e gobierno anterior. Awor cu e documento a wordo comparti, ta cla cu nada di esey no ta berdad. “E publicacion ey, cu otro medio a sigui sin verifica, a resulta puro manipulacion. Porta esey ta e motibo pa cual e gobierno a warda tanto tempo pa comparti e conseho,” segun Wever-Croes.
“E situacion aki ta mustra un bez mas cu transparencia, informacion na tempo y bon gobernacion ta esencial, specialmente ora cu ta trata di inversionnan publico grandi,” Wever-Croes a conclui. “Mi ta spera un reaccion por escrito di e minister dentro di dos siman.”
