Diabierna dia 30 di mei ex Prome Minister Evelyn Wever-Croes a participa na e di 22 Conferencia di Liderasgo Femenino na Curacao. El’a elabora riba con e ta trese y tene balans entre tur e areanan di su bida.
Den un mundo cu hopi biaha ta forsa nos pa scohe entre liderasgo y realisacion personal, mi a descubri cu e exito real ta bin ora nos no sacrifica un pa e otro, sino ora nos logra harmonia entre nan dos. Como e prome Prome Minister femenino di pais Aruba, mi a experiencia con sensitivo e ta pa logra un balans entre responsabilidad y identidad. Loke a sostene mi, ta un compromiso profundo cu integridad y un practica di balansa basa riba 4 pilar: famia, carera, fe y servicio na otro.
Famia ta caminda liderasgo ta cuminsa. E ta nos prome comunidad, caminda nos norma y balor ta wordo forma, y nos capacidad pa stima, dirigi y pordona ta nace. Si mi no tabata organisa tur cos na cas prome cu bai traha, mi no por a duna 100% na mi trabou. Y mi a siña cu nos no ta logra balansa nos so.
Carera ta mas cu ambicion. Como hende muhe, nos no ta traha solamente pa un titulo of resume; nos ta traha pa habri caminda pa otro tambe. Liderasgo real no ta hasi tur cos bo so, sino ta traha un ekipo fuerte, confia den otro, y yuda otro subi tambe na top.
Fe ta nos anker. No ta importa si e ta basa riba relacion ku Dios of un sentido profundo di proposito, fe ta duna nos claridad ora e caminda ta dificil. E ta recorda nos cu nos no ta nos so, y cu fortalesa hopi biaha ta bin den momentonan trankil di refleccion y confiansa.
Finalmente, servicio na otro ta e curason di liderasgo. No ta poder ta loke ta defini un lider, sino e impacto. Bo no mester hasi demasiado esfuerso, pero si, bo mester sirbi cu intencion. Sea un mentor, yuda den comunidad, of simplemente scucha un hende cu ta sinti su mes su so. Eseynan tur ta forma di liderasgo humano y humilde.
Balansa no ta un destinacion, e ta un compromiso di tur dia. E ta encera bisa “no” cu gratitud, pidi yudansa sin sinti culpa, y hasi esnan cu ta importante pa bo cu pasenshi, curashi y balor.
Si nos kier mira mas muhe na mesa di desicion, nos mester prepara, sostene y habri e portanan pa tur cu ta bin tras di nos. Tin espacio pa nos tur briya. Y ora nos subi, nos mester yuda otro subi tambe.
Liderasgo real no kiermen haci tur cos. E kiermen haci loke ta mas importante, cu presencia, cu curason, y cu integridad.
