Copa Noord 2025 dedica na Johannes “Poy” Flanegin, Alvaro Barrios, Nel Frank y Francis Arcaya a continua diadomingo ultimo riba veld di Kudawecha. Salbabo ta mantene su invicto den Pool B y ta posiciona su mes como lider den su Pool cu 3 gana y 0 perdi, derotando e fuerte ekipo di Kudawecha Redskins. Redskins mester depende riba resultadonan di otro ekipo pa purba clasifica pero “onderling” Super Plus tambe a derota Redskins 9-8 e siman anterior y asina Super Plus ta clasifica na di tercer puesto mientras Kudawecha Redskins ta despidi di Copa Noord 2025.
Salbabo ta sali brabo brabo den cabez di promer inning contra e picther Jason Orman anotando 8 careda a palo limpio. Salbabo ta aumenta e score cu 2 careda den cabez di dos inning hasiendo e wega 10-0. Den bom di dos inning Redskins ta corta ventaha anotando 1 careda y den bom di 3 inning nan ta acumula 3 mas. Salbabo ta keda molestia cu 1 careda den 4 y 5 inning pa hasi e wega 12-4 mientras Redskins ta anota un careda mas unda finalmente wega ta termina 12-5 pa Salbabo kendenan a celebra sin fin. Charli Contreras Pulido ta bay e ruta completo y ta seya e victoria riba su nomber. Jason Orman ta resulta pitcher perdedor ricibiendo relevo di Bryan Courtar den promer inning kende na su turno a wordo releva pa Jeremy. Resultado final Salbabo 12 careda, 15 hit, 1 error y ta laga 7 coredor na base. Kudawecha Redskins 5 careda, 12 hit, 1 error y ta laga 11 coredor riba base. Mihor bateadornan pa Salbabo ta Theomar “Totto” Gei y Nigel Calmes ambos di 4-2, Leonilo Cocom di 4-3 y Ruwin Tromp di 3-2. Pa Redskins a destaca na plato Vinshelly Winterdal 3-2 y Jorge Espinal 4-2, Jason Orman 2-2 y Mitchel Martes di 1-1. Salbabo ta clasifica number uno den Pool B y lo topa Stingers kende a clasifica number tres den Pool A, Diasabra awor 14 di Juni pa 9 pm na veld di Kudawecha. Copa Noord 2025 ta den su recta final cu 3 wega di cruse, 5pm,7pm, y 9pm. Pues un pa tera y un pa lama unda e ganadornan solamente lo sigui pa diadomingo mas (1) mihor perdedor.
Diadomingo awor 15 di Juni dia di Tata lo tin e gran final cu Tsunami!
Diadomingo 15 di juni “Tatanan” lo celebra na veld di Kudawecha. Desde 10 or di mainta lo tin wega y ambiente mientras e dos semi finalnan lo wordo hunga 12pm y 2 pm. Pa 4pm di atardi e ganadornan lo topa otro den e “Gran Final di Copa Noord 2025” pa despues celebra cu Tsunami te 10 or di anochi. No laga nan conta Bo. Copa Noord 2025 hunto cu HEINEKEN diadomingo awor den su recta final!
