Mientras cu gobierno di Hulanda a cay y ta oficialmente den estado demisionario, minister Gerlien Croes a subi na avion di KLM rumbo pa Hulanda, hunto cu un grupo grandi.
Den e grupo ta inclui dos periodista di 24ora: Speed Andrade y su camarografo Gleison, cu supuestamente ta den un “biahe di trabou” hunto cu e minister. Trabou? Cu ken? Si gobierno di Hulanda no tin poder pa tuma decision y ningun reunion oficial por tuma luga, kico ta e meta real di e biahe aki?
Segun fuente confiabel, gasto total di ticket ta pasa 42 mil florin, tur paga cu placa di pueblo. Hopi hende ta keda kibra cabes: Ta un vakantie cu stempel oficial di Gobierno riba dje ?
Lo mas interesante: Speed Andrade, e mesun periodista cu tabata semper critico ora otro minister a bay biaha, awo ta keto keto.
Si tabata un minister di otro grupo politico, ta sigur cu lo tin grito, video, live y articulo riba articulo. Pero awo… silencio total.
Mientrastanto, pueblo ta keda warda pa mira un resultado concreto, paso te awo, e unico cos cu ta cla, ta e gasto.
Solo di Pueblo lo keda wak bon. Pasobra si no tin reunion oficial, no tin acuerdo firma, ta pa kico realmente e biahe ta e ora?
