Recientemente un website di noticia Hulandes a publica un comunicado na unda ta bisa cu Caft a indica cu Gabinete Wever-Croes a laga un debe di 200 miyon florin atras pa e pueblo di Aruba. Riba e comunicado aki, Parlamentario Evelyn Wever-Croes ta reacciona bisando cu esaki no ta berdad, y cu tur cartanan di Caft ta indica cu e gobierno anterior a laga atras un surplus di 500 miyon florin.
Na momento cu e comunicado aki a sali, medionan di comunicacion na papiamento a tuma e noticia aki sin pensa over y a public’e na varios ocasion. Despues di a haya e informacion corecto cierto medionan di comunicacion a rectifica parcialemente, mirando cu e noticia aki tabata simplemente un manera di kita atencion di tur e desaster cu ta pasando den e gobierno nobo, den cuadro di e screening.
Parlamentario Wever-Croes a indica cu di momento cu e comunicado aki a sali, fraccion di MEP den Parlamento a purba na haya e conseho di Caft. Despues di tine scondi pa varios luna, Minister Geoffrey Wever ta manda e conseho aki Parlamento. Prome cos cu ta resalta ta cu e documento aki ta data 3 di April 2025, pues gobierno tabata tin e conseho aki pa 2 luna scondi. Tambe por a nota, lesando e documento, cu niun caminda ta poni cu Gabinete Wever-Croes a laga un debe atrás, of a haci algo malo y cu lo mester wordo investiga.
E documento aki, cu e conseho di Caft, a wordo publica pa henter comunidad por lesa y comprende exactamente kico Caft a bisa realmente. Loke si por lesa den e documento aki ta cu Caft ta duna dos conseho fuerte pa e gobierno nobo di AVP-Futuro. E prome conseho tin di haber cu e “corporate governance code”, na unda nan ta pidi pa bin cu e ley, mirando cu e gobierno nobo aki a bin pa bula cabes di tur hende cu ta den hunta di comisaris di e diferente companianan estatal y di e directornan. Tambe nan ta pidi pa pone e compania AWSS, cu a tuma over e instalacionnan di e planta di purificacion na Bubali, cay bou di sector publico, pa asina e compania por haya un fiansa sea di Gobierno di Aruba of di Hulanda na un interes mas abou, preveniendo asina pa e compania bay falliet.
Parlamentario Wever-Croes ta spera cu comunidad di Aruba tuma un rato pa lesa e conseho di Caft pa asina realisa cu niun caminda ta indica cu Gabinete Wever-Croes a haci algo malo. E compania di AWSS a wordo lanta mescos cu tur otro compania estatal. No tin nada malo ni nada straño cu a wordo haci. E ex gobernantenan di Gabinete Wever-Croes a traha semper na un manera integro y p’esey awe nan consenshi ta limpi y trankil. Un biaha mas e berdad a alcansa e mentira.
