Nos ta bibando den un tempo cu hende kier wak mas placa, placa, placa, poder, negoshi,luho, grandesa, competencia, ken por mas, ken por halsa su mes, pa asina nos busca nos propio gloria, enbes di duna gloria na Dios.
Hopi hende no kier realisa cu sin Dios, no no por haci nada, y cu nos tur ta depende di Dios, pa e rosea cu nos ta hala tur dia, pa nos salud, pa nos famia, pa nos trabao, pasobra ta Dios ta donjo di tur cos, Dios ta Todopoderso.
E enemigo tin e mente di hopi hende (mindset) gara riba un lock di orguyo, cu aunke, nan ta ripara cu e caminda cual nan ta cana aden no ta e caminda berdadero, no ta boluntad di Dios,toch nan ta persisti, den scuridad y den inmoralidad, serando wowo, y tapando horea pa no scucha e berdad di Dios.
Pero tin gran bendicion ora un homber , un tata di cas, esun cu Dios a pone na cabes di cas ta obediente y tin temor di Dios:
Bendiciona ta e hende cu ta teme Senjor,cu tin gran delicia den Su mandamentonan.
Su desendientenan lo ta poderoso riba tera, e generacion di e recto lo ta bendiciona
Tin prosperidad y rikesa den su cas, y su husticia ta permanece pa semper. ( Salmo 112;1-3).
Den temor di Senjor tin confiansa fuerte, y su yiunan lo tin un lugar di refugio.( Proverbionan 14:26).
Nieto ta corona di hende bieu, y gloria di e yiunan ta nan mayornan.(Proverbionan 17:6).
Sabiduria ta bini ora nos scucha di Dios, y haci locual E ta bisa.
Bendiciona ta tur esnan cu ta teme Senjor, cu ta cana den Su camindanan.
Ora bo come di e trabao di bo mannan, lo bo ta felis y lo bay bo bon.
Bo esposa lo ta manera un mata di wijndruif fructifero,den eparti di mas paden di bo cas.
Bo yuinan lo ta manera palo di olijfi, rond di bo mesa.
Mira asina e homber cu ta teme Senjor lo wordo bendiciona.( Salmo 128;1-4).
Bendicion semper ta bini di ariba, y e ta cuminsa riba e mayornan den cas, y asina alcansa henter e Famia,ora mayornan ta busca Dios, tin Dios na prome lugar den nan bida, e yiunan tin seguridad, tin refugio, pasobra Dios ta cubri henter e cas cu Su gracia y fabor.
Ta keda na nos cada un como mayor di duna testimonio, cu nos bida na nos yuinan, di tur locual Dios a haci pa nos y tambe tur locual e ta haciendo pa nos, nos yuinan mester ta na altura cu tur locual cu nos tin, y tur locual cu nan ta ricibi for di nos ta Dios a provee.
Un tata mester sostene na Dios pa e por guia su Famia, pa su vision por ta completo,pa e sa cu ora bo ta un tata, ta un yamada di Dios riba bo bida, y cu ta un previlegio pa ta un tata y cu e presencia di Dios lo ta cu bo tur momento.
Un tata mester coregi y displina su yuinan, pasobra coreccion y displina ta bini di Dios, pasobra Dios ta disiplina esun cu e ta stima, y ta nos deber di pone orden den cas, y den bida di nos yuinan, pasobra nos ta yama pa haci esey.
Mescos cu un tata tin compasion di su yiunan, asina Senjor tin compasion di esnan cu ta tem’E.( Salmo 103:13).
No tin nada mas precioso y bunita, ora un tata ta stima Dios.
Sinceramente, Pastor Marcel Balootje
