E anuncio nobo di gobierno di Aruba, bou di liderazgo di señor Eman, pa transforma un cas na Noord, den Semeleerstraat, den un scol di musica a wordo ricibi cu hopi precupacion i disgusto den comunidad. Mientras cu Aruba ta sufri di un gran falta di vivienda i huur ta subi mas i mas, e decision aki ta duna impresion cu gobierno no ta pone e necesidadnan urgente di pueblo na e lugar cu merece.
Hopi famia ta keda riba un lista di espera pa haya un cas digno i accesibel. Pero, na lugar di usa e cas aki pa un famia cu ta busca un miho calidad di bida, gobierno a scohe pa duna prioridad na un scol di musica. Sin duda, musica i educacion cultural tin su balor, pero e pregunta ta: den e momento dificil aki, nos no mester duna prioridad na vivienda prome?
E pueblo ta sigui warda pa solucionnan real pa un problema cu ta bira mas serio tur dia. Pone un scol di musica, por a haya un espacio den MFA Noord, of por a wordo ubica na ex hulpbestuurskantoor Noord, of te hasta Centro di Bario Noord. Kita un dak, kita un vivienda, pa pone scol, ta muestra cu Eman no tin prioridad corecto.
