A purba tapa e noticia

Marko Espinoza, cu tabata fungi como Hefe di Prensa di Gabinete AVP-Futuro, a wordo removi for di su funcion despues di un incidente serio cu a sosode dialuna anochi manece diamars mainta.

Segun informacion cu a sali na cla, dialuna anochi Espinoza tabata hunto cu Minister Wendrick Cecilia na Papiamento Restaurant na Washington, unda tabatin un reunion di cruise lines pa e convention cu a wordo teni na Aruba. Despues di esaki, nan a bay La Oficina na Tanki Flip pa continua e celebracion.

Hopi laat den anochi, Espinoza a tuma decision pa coy su auto pa bay cas. Durante trajecto, e tabata manehando bou influencia di alcohol ora cu el’a perde control di su vehiculo y a cay den un rooi banda di caminda. Polis a yega na e sitio y despues di lag’e supla, nan a confirma cu e tabata hopi burachi.

Bao di protesta y gritonan, polis a detene Espinoza inmediatamente y a hib’e warda di polis unda el a pasa henter marduga den cel. Durante e detencion e tabata puntra polisnan si ‘nan sa ta ken e ta’. Y ne sitio e tabata purba di yama Mike Eman. Segun un testigo, Cecilia a yega tambe na e sitio, pero polisnan a consehe pe sigui caminda di cas.

Segun a bin compronde, na Bestuurskantoor e noticia a core den tur oficina y Eman y Gerlien a duna opdracht pa move Espinosa di su funccion mesora.

E decision a wordo tuma debi cu su comportacion no tabata digno ni integro pa un persona cu ta ocupa e posicion importante di Hefe di Prensa di gobierno. Como consecuencia, Espinoza a wordo despidi inmediatamente for di su funcion.

Aparte di ta hefe di prensa, algun dia pasa e tabata representante di Prome Minister Eman na varios actividad. Pues, esey ta haci e situacion mas peor.

Gabinete AVP-Futuro awor mester busca un remplasante pa ocupa e posicion di vocero, mientras tanto nan lo funciona sin un Hefe di Prensa oficial.

Notabel ta cu gobierno y 24Ora a purba na tur sorto di forma pa tapa e noticia aki. Aparentemente hasta polis a haya instruccion pa no divulga nada.