Prome Minister tin solamente algun ora pa resolve e crisis di screening
E situacion politico rondona e caso di screening di Mike de Meza a yega na un punto critico. Prome Minister Mike Eman ta para dilanti un di e decisionnan mas importante di su carrera politico, y e orario literalmente ta coriendo.
E countdown a cuminsa
E portal di noticia “noticia cla” a confirma via su fuentenan cu Eman tin solamente un periodo cortico pa tuma decision tocante e candidatura di de Meza pa minister. E ley di screening no ta duna tempo indefini, y cada dia cu pasa ta haci e situacion mas insostenibel.
E presion riba Eman ta biniendo for di varios banda: e pueblo Arubano ta spera transparencia, su partido politico ta busca stabilidad, y e ley ta exigi cumplimento. Mei mei di tur esaki, amistad personal ta haci e decision ainda mas dificil.
Entre espada y la pared
Un analista politico a comenta: “Eman ta den un posicion dificil. E mester scohe entre mantene un amistad di añas of cumpli cu su deber como Prome Minister.”
E hecho cu de Meza ta bay corte como sospechoso a trece un motibo nobo na e situacion. Esaki nifica cu e debate no ta trata mas di si documentonan ta completo, sino si un sospechoso penal por wordo apunta como minister.
Tardansa, sin tuma decision
Mientras Eman ta hesita, e funcionamento di gobierno ta wordo afecta. Ministerionan ta opera sin un lider , y proyectonan importante ta keda para. Aruba merece un gobierno cu ta funciona na su capacidad completo.
Ademas, cada dia di tardansa ta daña e credibilidad di e proceso di screening. Si e ley no wordo aplica, kico ta e proposito di tin tal ley?
Kico ta e opcionnan?
Eman tin dos caminda dilanti dje:
Opcion 1: Notifica de Meza segun ley cu e no por wordo apunta como minister y propone un candidato nobo. Esaki lo preserva integridad di e proceso pero por daña amistad personal. De Meza por dicidi di bira independiente.
Opcion 2: continua, sin tuma decision y spera cu milagrosamente e situacion lo resolve su mes. Pero esaki ta un strategia peligroso cu por resulta den consecuencianan legal y politico serio.
E momento di berdad
Pueblo Arubano ta wak, y nan ta spera cu nan Prome Minister lo demostra liderazgo den e momento dificil aki. Tempo pa diplomacia y hesitacion a pasa, awor ta tempo pa accion decisivo.
