ORANJESTAD — E reciente nombracion di dos director nobo na e compania di utilidad di Aruba, Utilities NV, a causa hopi precupacion y critica den comunidad, pa motibo cu aparentemente no tabatin un proceso habri di solicitacion pa e puesto importante aki.
Segun un noticiero liga na gobierno, e gabinete nobo a tuma e desicion pa suspende e director di Utilities NV, Ton Rojer, y na su lugar a nombra Joseph Everon como director nobo. Tambe Randolph Ruiz a wordo nombra como director financiero di e compania. Loke ta lanta mas pregunta ta e echo cu ambos persona, durante nan trabou na Web Aruba NV, a enfrenta cuestionamiento y problema den nan funcion, y eventualmente a sali for di e empresa. Awor, sin un proceso cla di solicitacion, nan ta regresa den posicion clave den e compania madre di Web NV.
Esaki ta contradici fuertemente loke minister Gerlien Croes a priminti na principio di e gobierno actual: cu tur nombracion den su ministerio y den entidad bou su encargo lo pasa via un proceso habri, esta un open solicitatie procedure.
E pregunta cu ta presente awor den comunidad ta:
Unda e proceso priminti a keda?
Unda e propaganda cu ta anuncia e vacatura a keda? Unda e comision di seleccion cu mester evalua e candidato ta? Unda e prueba cu ta mustra cu e persona ta cla pa guia Utilities NV, un di e empresanan mas estrategico di e pais?
Si e noticia aki ta resulta cu ta berdad, e señal ta serio: un biaha mas, ta pone hende den puesto clave sin solicitacion, sin transparencia y sin responsabilisa na pueblo, y esaki por habri e porta pa desicion cu no ta den interes publico sino interes particular.
E comunidad y tur sector cu ta warda bon gobernacion lo keda wak cu atencion pa e reaccion di gobierno, cu te na e ora cu nos ta traha e noticia aki no tabatin ningun comentario oficial riba e nombramento ni riba e proceso cu nan a sigui.
