Awe mainta e homber K.(57), chofer di ex Promer Minister, a presenta dilanti Hues pa scucha su decision riba e peticionnan pa investigacion cu abogado mr. Rosenstand a haci.
SOLO DI PUEBLO por a compronde cu K. ta keda encarcela y cu Hues a bay di acuerdo pa scucha cuater di e seis testigonan cu mr. Rosenstand a pidi.
Dia 12 Juni 2025, tabatin e caso penal “pro forma” contra di K. No tabatin tratamento di e caso, sino cu Hues tabata kier sa si abogado tin peticion pa investigacion(nan) y fiha un fecha pa tratamento di e caso. Ta asina cu e dia ey, K. no a presenta. E acusacionnan cu Fiscal a presenta contra K. ta:
– Den e periodo entre 4 April 2015 te 13 Mei 2023, K. a abusa di un mucha muher menor di edad.
– Fiscal ta acusa K. tambe di cu entre 25 Augustus 2019 te 13 Mei 2023, K. a abusa di un otro mucha muher menor di edad.
– Fiscal a sigui bisa cu K. ta wordo acusa di tabatin pornografia infantal den periodo di 27 Juni 2022 te 4 Maart 2025.
– Fiscal tambe a acusa K. di posecion di seis arma di candela, balanan y peñanan riba 4 Maart 2025.
CUATER TESTIGO LO WORDO SCUCHA
Hues a bisa cu e ta rechaza e peticion di abogado mr. Rosentand, pa laga K. liber te ora cu tratamento di e caso tuma lugar.
Hues a bisa cu riba e peticion di mr. Rosenstand, pa scucha seis testigo, e ta bay di acuerdo pa scucha cuater testigo cu ta tres dama y un homber. Hues a rechaza entre otro pa scucha e director di club di tiro cu K. ta forma parti di dje.
Hues a rechaza e peticion di mr. Rosenstand pa e seis armanan bay bek pa e club di tiro. Hues a bisa cu mester warda resultado di tratamento di e caso penal pa mira si e armanan lo wordo debolbe na e club di tiro of si nan lo keda confisca.
Por a compronde, cu cinco di e armanan tabata den un caha fuerte y un arma tabata poni riba e caha fuerte.
Hues a bisa cu e ta bay di acuerdo cu e proposicion di Fiscal pa pospone e caso pa dia 19 September 2025. Hues a pospone e caso pa dia 19 September 2025 pa 9.15 di mainta.
