Nos por corda cu durante henter campaña lider di Partido Futuro actual minister Gerlien Croes como tambe minister Wever a bisa cu Aruba ta hopi caro. Nan a priminti cu nan lo mehora e poder di compra y baha e costo di bida. Nan a priminti cu nan lo reduci e prijs di gasoline, nan lo mehora e poder di compra, nan lo elimina aircogeld di scol pa mayornan den nan prome 90 dianan di gobernacion.
Esaki ta loke pueblo a wordo priminti, esaki ta e expectativa cu NAN a crea. Awe e realidad ta diferente, y aunke nos tawata sa cu nan NO lo cumpli, nan NO a cumpli cu nan promesanan.
Awe, despues di eleccion di 6 december 2024 Aruba ta mas caro cu nunca. Tur prijs di tur producto ta subiendo tur dia,
Minister Wever a bisa na varios ocasion cu frigidairenan na Aruba ta bashi y nan lo percura pa yena esakinan. Awe no solamente frigidriarenan ta bashi pero hende tin miedo di cushina. Minister Wever a claba pueblo un aumento di gas di 60 florin pa 80 florin, un aumento di 33.3%. Ta increibel cu te awe e no kier duna cuenta, e no kier bin parlamento y no kier corigi e decision aki cu ta perhudica miles di hende cu ta bende cuminda na Aruba pa sobrevivi. E ta subi prijs di gas pa pueblo pa yuda un compania cu a gana 13 miyon florin.
- Prijs di lechi a subi cu mas di 10% siendo lechi ta den canasta basico. Unda minister Wever ta pa controla productonan den canasta basico?
- Prijs di coffee a subi cu mas di 10% y minister di inflacion man crusa?
- Prijs di 1 kilo di galiña a subi cu di 5.75 pa 8 florin, un aumento di 40%.
- Prijs di gasolin a subi algun dia pasa siendo a wordo priminti cu den e promer 90 dianan e ta baha.
Minister Wever tawata den parlamento y enbes cu e ta keda consistente y reconoce cu Aruba keto bay ta caro y mester un plan holistico, integral con pa atende cu e prijsnan cu ta subiendo explosivamente, e la bisa den parlamento cu 99% di e prijsnan na Aruba NO a subi!!!
Aki bo ta mira claramente cu minister Wever ta totalmente desconecta di e realidad y e ta “in denial” . E no kier admiti cu e no tin vision, e no tin plan y e no kier admiti cu prijsnan na Aruba ta skyrocket y Aruba ta mas caro cu nunca.
Nos a bolbe puntra minister Wever ki dia su plan di accion ta cla y nos a haya e mesun contesta, cu e ta trahando keto bay riba e plan. Ironico ta cu den campaña tawata tin un plan cla pa ehecuta den e promer 90 dianan di gobernacion y awor cu nan ta den gobierno ta trahando riba e plan.
Aki bo ta mira con e junior partner di coalicion Partido Futuro ta un decepcion y ta hiba e mesun politica di gañamento di partido AVP!
