Awe mainta e hombernan D.R.A.(29) y R.D.P.(28) y e damanan L.T.(23) y K.D.(22), a presenta den Corte pa e caso penal cu Ministerio Publico a cuminsa contra nan. E caso ta relaciona cu hinca droga den KIA, hacienda uso di Drone. E dos damanan, ta pareha di e dos hombernan y tabata hiba nan banda di KIA.
SOLO DI PUEBLO por a compronde cu 13 biaha a hinca droga den KIA via Drone. Un biaha a haya 4 cellular den un cel di preso y otro biahanan ta saconan chikito y pakinan chikito di marihuana cu a haya riba tereno di KIA.
yera henter mainta a keda dedica na tratamento di e caso di pasamento di droga den KIA via Drone. Fiscal ta haya cu e hombernan D.R.A. (29) y R.D.P. (28), ta complice di e pasamento di droga den KIA entre 1 Juli 2024 y 20 Augustus 2024. Fiscal ta haya cu e damanan L.T.(23) y K.D.(22) a yuda, door di hiba D.R.A. y R.D.P. En total ta papia di 13 vuelo di Drone.
HINCA DROGA DEN KIA CU DRONE
E acusacion cu Fiscal a presenta contra e homber D.R.A. y R.D.P. ta cu entre 1 Juli 2024 y 20 Augustus 2024, nan ta complice di tabatin marihuana den posecion y a hinca marihuana den KIA, hacienda uso di Drone. E dos damanan ta wordo acusa di a yuda D.R.A. y R.D.P., door di tabata hiba nan na un cas na De Vuist. Di e cas, D.R.A. y R.D.P. tabata cana bay e beach na Boca Grandi y di eynan tabata manda droga cu paki of saco di droga pa KIA.
Hues a bisa cu nan ta wordo sospecha di a usa Drones pa benta marihuana den KIA. Hues a puntra D.R.A. y el a bisa cu e sa cu el a haci malo. Hues a bisa cu D.R.A. a declara na Polis cu e tabata haya peticion di presonan na KIA y hendenan pafor tabata prepara tur cos. D.R.A., haciendo uso di Drone tabata percura pa e droga yega ariba tereno di KIA. El a bisa cu esun den KIA tabata wordo paga y e mitar ta paga D.R.A. Segun D.R. e no tabata haya pago sino placa di gastonan cu el a haci. El a nenga cu e cocaina cu a haya ta di dje.
R.D.P. tabata esun cu tabata vigila. El a bisa cu e tabata bay cu D.R.A. y D.R.A. tabata esun cu ta traha cu e Drone. Hues a bisa cu for declaracionnan por compronde cu nan tabata bay na e beach na Boca Grandi y di eynan tabata maneha Drone.
Hues mustra cu 24 Juli 2024 tabatin combersacion entre R.D.P. y K.D., kende a bisa cu nan ta aki tras y ta bay haci nan promer vuelo y pa busca nan. Hues a mustra cu R.D.P. y D.R.A. tabata wordo baha na un cas na De Vuist y nan tabata cana bay na e beach na Boca Grandi. Di eynan nan tabata usa Drone pa manda droga pa KIA y despues e Drone ta bay bek Boca Grandi y despues nan ta cana bay bek e cas na De Vuist caminda nan tabata wordo busca door di K.D. y L.T.
EN TOTAL A HAYA 171,80 GRAM DI MARIHUANA
Fiscal a bisa Hues cu e caso a cuminsa door cu Polis a haya informacion cu D.R.A. y R.D.P. lo tabata hinca droga den KIA. Investigacion a haci den cellularnan di D.R.A. y R.D.P., a haya sa cu tabata usa 2 Drone. Den cellular a haya 7 vuelo di Drone for di beach Boca Grandi pa KIA entre 9’or di anochi y oranan laat. For di e celluarnan a haya combersacionnan cu tabata manda Drone y pa despues busca D.R.A. y R.D.P. na un cas na De Vuist.
Fiscal a mustra cu guardianan di KIA a haya den KIA un saco di plastic cu mas o menos 22 gram di marihuana. Dia 28 Juli 2024, guardianan di KIA a haya 76,7 gram di marihuana riba e dak di un seccion di celnan. Guardianan di KIA a mira un Drone pasa riba KIA y cu for di un cel a coy un paki for di e Drone. A haci investigacion den e cel y a haya 4 cellular. En total 171,80 gram a keda intercepta.
Dia 19 Augustus 2024, miembronan di KIA a haya un Drone cu lo a cay caminda tabatin 20,8 gram di marihuana. Relaciona cu esaki, Polis a haci investigacion na un cas na Ponton caminda D.R.A. ta keda y a haya un lote di marihuana y 1,2 gram di cocaina. Tambe a haya cosnan di Drone. Na Sero Janchi na cas di R.D.P. a haya algun cos y a confisca auto di dama K.D.
CASTIGO
Fiscal ta haya e caso hopi serio. Hincamento di marihuana den KIA ta un asunto serio. Fiscal a exigi pa D.R.A. y R.D.P., 18 luna di prison di cual 6 luna ta condicional cu un tempo di prueba di 2 aña. Fiscal a exigi pa L.T. y K.D., 360 dia di prison di cual 258 dia ta condicional cu un tempo di prueba di 2 aña. Esaki, bou guia di Reclasering. Esey ta nifica cu e damanan L.T. y K.D. no mester bay sera mas.
ABOGADO
Abogado mr. Griffith a bisa Hues cu L.T. tin relacion cu D.R.A. mientras cu K.D. tin un relacion di apenas 2 luna cu R.D.P. E abogado no ta haya cu L.T. y R.D.P. ta complice di traficacion di droga den KIA. El a bisa cu nan a yuda nan pareha pa hiba nan na e cas. Segun abogado, L.T. y K.D. no tabata sa kico tabata pasando. Nan no por tabata sa kico tabata pasa cu Drone. E abogado ta haya cu e auto di K.D. cu a keda confisca, mester wordo debolbe.
Abogado mr. Maldonado a bisa cu D.R.A. y R.D.P. a admiti di a pasa droga via Drone den KIA. E abogado a bisa Hues cu no tur droga cu a wordo haya riba tereno di KIA mester ta relaciona cu Drone di D.R.A. y R.D.P. Tin mas casonan di otro Drone. Na opinion di mr. Maldonado, si conta tur e droga, no ta yega na 500 gram di marihuana. El a bisa cu tin intentonan di Drone cu no a resulta.
Na opinion di mr. Maldonado, ya caba D.R.A. y R.D.P. tin 10 luna sera den KIA cu ta 2/3 parti di e castigo exigi pa Fiscal. E ta haya cu pa e cantidad di droga cu a haya, e periodo cu nan ta sera ta suficiente. E abogado a pidi Hues pa debolbe e auto di D.R.A., cu Fiscal a exigi pa keda confisca. E abogado ta haya cu e auto no realmente tabata wordo usa pa hiba droga KIA. El a bisa Hues cu e auto ta D.R.A. su unico medio di transporte.
Hues a sera tratamento di e caso y a bisa cu e ta bay studia e caso y dia 11 Juli 2025 lo tin sentencia.
