Stichting One Happy Bike Island y Koningin Wilhelmina Fonds cu gran orguyo ta anuncia nan di dos edicion anual di Ride For The Roses Aruba, dia 30 di November 2025 pa 7or di mainta. E evento inspirador aki ta un dia di union, movemento y speransa, caminda henter famia ta bin move pa salud y prevencion di Cancer pero tambe pa mustra apoyo na pashentnan cu Cancer na Aruba.
E evento aki ta pa tur persona di tur edad y por scoge pa cana, core, haci ciclismo of participa den landamento. Bo aporte ta importante. Ticket ta solamente Awg.35,- pa persona y tur fondo recauda lo beneficia Koningin Wilhelmina Fonds.
Tocante Koningin Wilhelmina Fonds
For di su fundacion na aña 1961, KWF ta dedica su mes na yuda pashentnan cu tin Cancer y ta haci campañanan di Conscientisacion pa Prevencion di Cancer na Aruba. KWF no ta ricibi subsidio di gobierno y ta depende completamente di e generosidad di comunidad y e dedicacion di su boluntarionan. Fondonan cu KWF ta recauda durante henter aña ta bay completamente pa yuda pashentnan y nan famia cu apoyo y producto y servicionan cu no ta wordo cubri of ofreci door di AZV, manera prothesis di pecho, transporte pa bay tratamiento y bishita di dokter.
Keda pendiente! Den e siguiente simannan lo publica mas detaye tocante registracion y otro informacion important via nos pagina di Facebook: Ride For The Roses Aruba.
