Fiscal ta exigi 18 luna di prison pa sospechoso cu a laga homber guli bolitanan di cocaina y a fayece
ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e hombernan J.M.Z. (25) y G.E.T. (40). Ta asina cu e caso contra e homber G.E.T. a keda pospone riba peticion di su abogado mr. D.Croes.
SOLO DI PUEBLO por a compronde cu J.M.Z. tabata para riba cu e no tin nada di haci cu e caso mientras cu Fiscal ta haya cu ta J.M.Z., riba orden di G.E.T. a bay Colombia y mester a percura pa e defunto Terence D’Aguiar guli bolitanan y bin Aruba.
HOMBER A GULI 42 BOLITA Y FAYECE
Hues a bisa cu segun Polis, 26 December 2024 a haya informacion cu un hende cu a guli bolitanan di cocaina na Colombia, a bin Aruba y a fayece. Ta asina cu e persona ta defunto Terence D’Aguiar. Investigacin ta mustra cu na Medellin, D’Aguiar a guli 42 bolita cu a pisa 504 gram. A constata cu e bolitanan tabata mal traha y pesey 2 a kibra.
Segun e procesverbaal di Polis, D’Aguiar su pareha, Wolff a declara cu esun cu a papia cu D’Aguair tabata G.E.T. E amiga Wolff a bisa cu J.M.Z. a bay cu D’Aguiar. Segun J.M.Z. el a bay Colombia pa haci compras di regalo y G.E.T. a pidi’e pa controla D’Aguiar cu ta usa droga y pa D’Aguiar no bay perde riba caya. J.M.Z. a bisa Hues cu esey a yega di pasa cu D’Aguiar a perde riba caya na Colombia.
J.M.Z. a sigui bisa cu el a bisa G.E.T. cu e no ta bay tuma risico cu asunto di droga. El a splica Hues cu den pasado el a yega di haya problema den droga y el a cambia su bida. E ta traha y a stop cu e bida negativo ey.
Segun J.M.Z., el a dicidi di tira bista riba D’Aguiar, mientras cu e tabata na Colombia. El a cumpra regalonan y a bin Aruba. Despues el a haya yamada di Wolff, cu D’Aguair a bira malo. J.M.Z. a yama Ambulance pa bay na e cas. El a bisa Hues cu e no tabata sa kico a pasa. El a sigui bisa cu despues G.E.T. a yam’e y bis’e pa bay entrega e auto di huur. Ora J.M.Z. a yega na cas di G.E.T., G.E.T. a bis’e cu D’Aguiar a fayece. Na dado momento Polis a yega na cas y detene nan. Segun J.M.Z., Polis tabata insisti pa e bay controla na hospital si e no a guli bolita. Polis tabata sospecha cu J.M.Z. tambe a guli. Segun J.M.Z., el a splica Polis cu na Colombia caba el a wordo listra. El a insisti cu e no a guli nada. Sinembargo, el a dicidi di bay toch hospital pa controla y no tabatin nada.
POLIS TA GAÑA DEN DECLARACION
Hues a mustra cu na Polis, J.M.Z. a declara cu e tabata sa cu D’Aguiar tabata guli bolitanan y el a bay sinta pafor y huma sigaria. J.M.Z. ta para riba cu e no tabata sa cu D’Aguiar tabata guli bolitanan di cocaina. El a bisa Hues cu e ta sinti cu el a wordo usa. El a bisa cu e no ta compronde con Polis ta bisa esey siendo cu e no a declara asina. El a bisa Hues cu Polis a bis’e pa firma un papel pero e no sa kico tabatin skirbi. E ta haya cu Polis ta gaña y e no sa pakico.
Hues a bisa cu segun e pareha, Wolff, G.E.T. a manda J.M.Z. pa controla cu D’Aguiar ta guli bolita. J.M.Z. a reacciona den Corte, cu e no a bay pa obliga D’Aguiar guli bolitanan. El a bisa cu e ta lamenta hopi loke a sosode. J.M.Z. a bisa Hues cu ora el a mira D’Aguiar yega cu taxi na Colombia, ya caba e tabata droga. J.M.Z. a bisa cu el a bay serca su famia y despues el a bay atrobe na D’Aguiar y a hay’e mal droga. El a bisa Hues cu despues el a bin Aruba y no tabata sa mes cu D’Aguiar a guli bolitanan.
Hues a mustra cu e amiga di J.M.Z., e dama S., a declara na Polis cu J.M.Z. a bis’e cu e ta bay Colombia pa controla cu D’Aguiar ta guli bolitanan pa despues bin Aruba. J.M.Z. a bisa Hues cu esey no por pasobra su amiga no ta compronde Hulandes ni Papiamento.
E momento ey, abogado mr. Odor a remarca na Hues cu den e procesverbaal di Polis ta mustra cu ta Polis a traduci pa e dama loke nan a pone riba papel. E abogado a bisa Hues cu e kier pa mira e video di interogacion pasobra e ta haya cu e dama a wordo forza.
EXIGI 18 LUNA DI PRISON
Fiscal a bisa Hues cu J.M.Z. a declara na Polis cu riba orden di G.E.T. el a bay Colombia cu D’Aguiar pa controla cu D’Aguiar ta guli bolitanan. Fiscal a bisa cu J.M.Z. a firma su declaracion na Polis y awor den Corte ta bisa cu e no sa kico el a firma. Fiscal ta kere cu J.M.Z. lo a wordo presiona door di G.E.T. na KIA y pesey kier cambia su declaracion. Fiscal ta haya cu tin suficiente prueba cu J.M.Z. a yuda den traficacion di 504 gram di cocaina.
Pa cu e castigo, Fiscal a bisa cu e ta tene cuenta cu na 2022, a condena J.M.Z. pa droga y awor atrobe e ta dilanti Hues pa caso di droga. Fiscal ta haya cu J.M.Z. tabata e intermediador pa percura cu D’Aguiar ta guli e bolitanan. Fiscal a exigi 18 luna di prison.
DEFENSA DI ABOGADO
Abogado mr. Odor a bisa Hues cu e unico declaracion cu lo por compromete J.M.Z., ta e ex pareha di J.M.Z., e dama S. E abogado a bisa Hues cu tanto J.M.Z. como e dama S. a wordo presiona door di Polis y tur cos mester ta graba riba video. E abogado ta persisti pa mira e videonan di interogacion. En todo caso e kier pa Hues mira con e interogacionnan a tuma lugar. E abogado a mustra cu e dama W., pareha di D’Aguiar, ta supone cu J.M.Z. ta envolvi den traficacion di droga pero no ta asina.
Hues a sera tratamento di e caso y a bisa cu dia 18 Juli 2025, e lo duna sentencia.
