Hues ta declara sospecho di a viola dama liber
ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e homber R. (38). E homber R. no a presenta pero si abogado mr. Carlo si.
SOLO DI PUEBLO por a compronde cu tanto Hues como Fiscal ta duda den e caso y a declara e sospecho R. liber.
E acusacionnan cu Fiscal a presenta contra R. ta cu dia 4 November 2021, el a viola y haci actonan inmoral cu e dama K. E dama K. no a presenta den Corte.
DUDA SI TABATIN VIOLACION
Hues a mustra cu K. a haci denuncia cu el a bay na e auto di R. pa haya un refresco. Den auto tabata R. y un amiga di R. K. a bisa cu R. y e amiga di R. a haci actonan inmoral cun’e y cu R. a forc’e pa tin relacion sexual.
Hues a bisa cu e ta haya e caso aki hopi straño. Hues a bisa cu e tin duda den declaracion K., kico a sosode. El a mustra cu Hues Comisario a interoga K. y e amiga di R. Hues ta haya cu na Hues Comisario, K. a duna declaracion completamente otro cu loke el a declara na KZP. Na Hues Comisario, K. a bisa cu el a bay den auto y a masashi R. cu tabatin dolor, pa 10 minuut largo. Hues tambe a remarca cu K., despues di e incidente, a manda whatsapp na R. caminda e ta cuminda R. Tur esaki ta haci cu Hues ta duda den declaracion di K.
Ta asina cu K. a haci un demanda di daño contra R. Segun K., e caso a causa cu el a divorcia di su pareha y cu el a keda cu trauma. El a demanda 3000 florin.
Abogado mr. Carlo a bisa Hues cu R. actualmente ta trahando na Hulanda. El a duna Hues un declaracion por escrito di R. R. a bisa cu e caso aki a afect’e pasobra e no a haci nada. El a bisa cu na 2023 el a dicidi bay biba na Hulanda y ta trahando.
FISCAL A PIDI DECLARA SOSPECHOSO LIBER
Fiscal a bisa Hues cu el a bin cu e caso pa Hues dicidi. Fiscal a mustra cu mester saca afor si realmente tabatin violacion, actonan inmoral of si tabatin un aventura den trio. Fiscal ta haya cu K. tabata consistente den su declaracionnan. Fiscal ta duda den declaracion di e amiga di R. y pesey ta pidi pa declara R. liber. Fiscal a bisa cu e declaracion liber di R. ta nifica tambe cu no por aproba e demanda di daño di K.
Abogado mr. Carlo a bisa Hues cu no sa socede cu tanto Hues como Fiscal no ta haya proba e acusacion. El a bisa cu e caso a traha riba R. E abogado ta contento cu tanto Hues y Fiscal ta duda cu R. ta culpabel.
HUES A DECLARA SOSPECHOSO DECLARA
Hues a sera tratamento di e caso y a dicta sentencia di biaha. Hues ta haya cu e declaracionnan di e victima K. no ta consistente y ta crea duda. Hues ta duda cu lo a sosode violacion of actonan inmoral. Hues a declara R. liber y no ta aproba e demanda di daño.
