Mesun huez cu a aproba e retiro di Endy Croes na 2010, a tuma decision riba e mmesun caso na 2025, poniendo e sistema legal di Aruba na seriamente na duda.
Un Conflicto di Interes Evidente
Na 2010, huez Roovers tabata esun cu a aproba e retiro di Endy Croes for di Fundacion Lotto pa Deporte (FLPD), basa riba un rapport di Ernst & Young (EY).
Na 2025, mesun huez Roovers, awor como huez-plaatsvervanger, a haya e tarea pa evalua si e mesun rapport di EY tabata ilegal. Esaki ta crea un conflicto di interes grave.
Si e huez a admiti cu EY su informe tabata fout, esey ta nifica cu su propio decision na 2010 tabata robes. Un huez no por evalua su mesun trabao anterior sin perde su neutralidad.
E pregunta fundamental ta con e sistema legal di Aruba por permiti un situacion asina.
Ignora e Decision di Hoge Raad
Na 2019, Hoge Raad di Hulanda a dictamina cu e informe di EY tabata onrechtmatig, pues sin procedimiento di defensa adecuado y cu conclusionnan parcial. Tambe a determina cu e retiro di Croes no tabata husto.
Pero na 2025, huez Roovers a ignora completamente e decision di Hoge Raad. El’a a sigui usa e mesun informe, cu ya tabata refuta y declara “onrechtmatig”, pa rechasa e reclamo di Croes.
Esaki ta pone e credibilidad di e corte den duda profundo y ta prolonga e daño cu Croes ta sufri pa un error legal cu nunca mester a existi.
Un menasa pa e Estado di Derecho
E caso ta pone na claridad un problema serio den e sistema di husticia di Aruba.
Ta trata di un posible violacion di Artikulo 6 di EVRM, cu garantiza un huez imparcial. Tambe ta mustra un falta di transparencia den nombramento di hueznan y ta mina e confianza publico den husticia.
Un experto legal a comenta cu un huez cu ta evalua su mesun decision anterior ta comparable cu un fiscal cu ta persigui su propio caso. Esaki ta contra e base di un estado di derecho.
Speransa den Beroep
Awor Endy Croes ta bay den beroep na corte di beroep, unda e tin mas probabilidad pa logra husticia. E ta busca un evaluacion nobo di su caso pa motibo di parcialidad di huez, un investigacion neutral y compensacion pa e daño cu e error legal aki a causa.
E pregunta no ta si e vonnis lo wordo anula, pasobra esey ta sigur. E pregunta ta “ki dia”? Esey lo mester warda riba e proceso.
Un dia scur pa Husticia
E caso di Endy Croes ta bai mas leu cu un individuo. Ta trata di e integridad di nos sistema legal.
Si e vonnis di Roovers keda, ta un señal cu autoridad por tuma decisionnan sin consecuencia. Si Beroep interveni, esey por restaura un parti di e confianza den ley y husticia.
Hueznan mester aplica ley, no proteha nan mes.
