Partido Patriotico Arubano (PPA) a dal e prome paso den reconstruccion di e Centro Patriotico na San Nicolas y p’esey mes a cuminsa cu un tremendo Fundraising di BBQ “Building 2gether”, unda tur e miembronan activo a traha hunto pa logra meta di e prome fase. E centro aki ta un edificio iconico cu tin como 15 aña caba cu no ta den funcion mas y a bay completamente atras. Basa riba un plan di accion, partido PPA a inicia pa renoba y reconstrui e centro bek.
Fase 1 Ehecuta
E plan di accion pa reconstrui y renoba e centro ta parti den cuater fase. “Diadomingo ultimo, durante un exitoso recaudacion di fondo di BBQ, pueblo di Aruba, specialmente e hendenan di San Nicolas, a mustra nan sosten completo, anhelando pa e centro aki bira bek loke e tabata antes; un centro placentero unda ta bin topa, dialoga, brainstorm y pasa tempo hunto”, Otmar Oduber a splica. E prome fase tabata pa haci e limpiesa necesario, ya cu casi no tabata ni por wak e edificio mas entre tur e mata- y sushinan.
Plan di accion riba termino largo
Pa realisa henter e meta di reconstruccion di e Centro Patriotico, lo dura cuater pa cinco aña. “Principal ta cu nos a cuminsa y unabes nos start, e entusiasmo y deseo ta bira mas grandi pa termina,” Otmar a expresa. E siguiente fasenan lo ta unda ta busca fondo pa renoba parti dilanti, despues sigui cu renobacion di e parti memey y finalmente lo haci e parti patras.
Vision pa futuro
Door cu e propiedad ta di e fundacion mes, miembro di PPA, Eduard Pieters a conta: “Den partijraad a tuma e decision pa renoba e Centro Patriotico, unda hopi decision importante pa Aruba a tuma lugar. Nos kier rebiba e lugar aki, modernis’e y hacie hasta un centro unda nos muchanan di bario por bin pa traha huiswerk of proyecto.”
PPA kier gradici henter comunidad cu a duna su sosten y haci e prome recaudacion di fondo uno sumamente exitoso y specialmente tur a bin combersa y duna palabra di sosten p’e tremendo trabou cu PPA ta haciendo actualmente den Parlamento. PPA su meta ta pa trece bida bek na e centro aki, unda e lo fungi como un centro di apoyo pa un y tur, specialmente e comunidad di San Nicolas. PPA kier duna bek na pueblo y kier sigui cu su compromiso pa traha na bienestar general di su hendenan.
