Awe mainta Hues a dicta sentencia den e caso penal cu Ministerio Publico a cuminsa contra e homber W.(74). Luna pasa tratamento di e caso a tuma lugar, caminda Fiscal ta haya W. culpabel di a abusa di un mucha muher bou di 12 aña y a exigi 5 aña di prison y pa W. paga e demanda di daño di 10 mil florin.
SOLO DI PUEBLO por a compronde cu Hues tambe ta haya W. culpabel, pero a condena W. na 4 aña di prison y cu W. mester paga 10 mil florin di daño.
HUES TA HAYA ACUSADO CULPABEL
Hues ta haya W. culpabel di a penetra e mucha cu su dede. Tambe Hues ta haya cu W. tabata mishi na e partinan intimo di e mucha. Tur esaki durante 2 aña largo.
Hues a splica cu segun decision di Corte Supremo di Hulanda, den casonan asina, mester busca pruebanan di sosten pasobra solamente tin e declaracion di e victima cu e acusado. Hues a mustra cu e victima a declara na KZP cu for tempo cu e tabatin 7 aña te cu 9 aña, mas cu 30 biaha, W. tabata abusa di dje na cas di su mayornan den camber. Hues a mustra cu e mucha tabata yora so ora e tabata duna declaracion na KZP.
Hues a sigui bisa cu otro testigo a bisa, cu e mucha a cont’e kico a pasa y tabata yora. E testigo tambe a bisa cu e mucha tabata corta su mes na su mannan.
Na opinion di Hues, tin prueba di sosten y tambe cu e acusado W. mes a admiti durante tratamento di e caso. El a admiti di a mishi cu e mucha na su pechonan y parti intimo, pero ta nenga di a penetra e mucha cu su dede. Hues a bisa cu e no ta kere W. Hues ta haya legalmente proba cu W. a penetra e mucha cu su dedenan diferente biaha y a mishi cu e mucha su partinan intimo.
Pa cu e castigo, Hues a bisa cu e ta tene cuenta cu seriedad di e caso. El a bisa cu Fiscal a exigi 5 aña di prison y abogado mr. Mohamed a bisa cu e castigo exigi ta dispropocional halto y tambe pa Hues tene cuenta cu salud di W.(74).
Hues ta haya cu durante 2 aña largo, W. tabata abusa di e mucha. Hues ta haya cu W. a abusa di e confianza di e mayornan a pone den W., pa wak pa nan yiu. Hues a sigui bisa cu W. a tacha e integridad di e mucha y cu e mucha a keda afecta.
Hues a mustra cu for di rapport di psycologo, te ainda e mucha ta afecta. Hues a bisa cu e ta tene cuenta cu orientacion di sentencianan di Corte Superior den casonan similar. Hues a condena W. na 4 aña di prison, kitando e tempo cu e ta sera den KIA.
Pa loke ta e demanda di daño, ta asina cu e mayornan a demanda 10 mil florin. Esaki door cu e mucha ta afecta. E ta corta su mes, e tin miedo y mester haya tratamento. Hues a aproba e demanda di 10 mil florin y a pone e medida di pago.
