Minister di Finansa Geoffrey Wever ta anuncia inicio di e fase di orientacion pa pidi informacion riba un sistema nobo di IT pa duna sosten na e proceso di preparacion di presupuesto, ehecucion y responsabilisacion di gasto y entradanan di Pais Aruba. E “Request for Information” ta forma parti di Landspakket pa un proceso presupuestario efectivo y eficiente den cual gobierno ta “in control” di finansa publico y por duna responsabilidad adecua na Parlamento di Aruba.
Inicio di e fase di orientacion pa un sistema nobo di IT pa duna sosten na e proceso di preparacion di presupuesto, ehecucion y responsabilicacion ta forma parti di e stapnan necesario pa yega na ehecucion di procesonan financiero standarisa basa riba uzo di tecnologia y cu ta conta pa tu ministerionan y departamentonan. Esaki ta forma parti di Tema Maneho Financiero (Financieel Beheer) di e Landspakket.
E cooperacion cu Hulanda a resulta di ta uno positivo cu a trece beneficio den forma di experticio, ayudo financiero y asistencia tecnico. ‘Landspakket’ ta un instrumento extra cu Aruba tin na su disposicion pa avansa e maneho necesario y realisa e vision pa un finansa duradero di Aruba den bienestar di tur ciudadano, y mester percura pa continua haci bon uzo di e cooperacion aki.
