Tur cos a wordo crea pa medio di e palabra di Dios, Dios a papia y e cosnan a sosode, pasobra Dios ta Todopoderoso, y no tin pa iguala cun’E.
Tur autoridad cu tin riba mundo ta bini di Dios; Laga tur hende somete nan mes na e autoridadnan cu ta goberna,Pasobra no tin autoridad cu no ta di Dios,y esnan cu ta existi, ta Dios a stablece nan. Pesey esun cu resisti autoridad a opone e ordenansa di Dios y lo ricibi condenacion riba nan mes.( 13:1-2).
Palabra di Dios ta bisa na tur mucha, Yiu honra bo tata y bo mama, pa tur cos bay bo bon, y pa bo tin dia largo riba e mundo aki, ora un mucha rebeldia contra su mayornan, e no ta rebeldia contra nan, pero contra Dios mes, pasobra autoridad ta bini di Dios, y ta pesey cos ta bay robes.
Cu E a eherce den Cristo, ora cu E a lant’E for di morto, y a haci’E sinta na su man drechi den lugarnan celestial, muchu mas halto cu tur gobierno,y autoridad y poder y dominio, y tur nomber cu ta wordo menta, no solamente den e siglo aki, ma den esun cu ta bin.
E a somete tur cos bao di su pianan y a duna E como cabes riba tur cos na e iglesia. Cual ta su curpa, e plenitud di esun cu ta yena tur den tur. ( Efesionan 1:20-23)
Te pesey awendia nos tur mester comprende cu tur rudia mester dobla, y tur lenga tin cu confesa cu Cristo Hesus ta Senjor pa Gloria di Dios tata.
Dios ta donjo di tur oro y tur plata, esey na nifica cu ningun hende no por cumpra Dios, ni tampoco cumpra e poder di Su Spirito Santo cu placa ( Hechonan 8:18-23).
No tin placa na mundo pa compara cu e Poder di Dios,
No tin Poder militar na mundo cu por enfrenta poder di Dios,
No tin bruheria ni santeria, tampoco otro clase di maldad y ocultismo cu por resisti e poder di Dios.
No tin ningun y no ta existi ningun mandatario riba e mundo aki cu su bos ta mas halto cu esun di Dios.
Ora Dios kier manifesta su poder e ta hacie pa medio di naturalesa, y no ta nada cu por para su dilanti.
Pesey Dios ta bisa for di comienso di mundo pa nos libra nos mes di tur Idolatria, tur locual ta dios falso pasobra ta e ta e unico Dios berdadero.
Si nos wak bon riba mundo aki tin hopi cu a yama nan mes Dios, pero tur ta dera te e dia di awe, nan a muri y nunca mas a lanta, pero solamente Cristo Hesus a lanta for di morto y ta sinta na man drechi di Dios Tata.
Ta solamente Cristo a baha for di cielo pa medio di Spirito Santo ( Lucas 1:35) a biba, muri y wordo dera y a lanta despues di tres dia for di morto y a subi na cielo. ( Lucas 24:4-8).
Nos ta bibando den un tempo di hopi manipulacion diabolico, hopi trocemento di palabra di Dios, hopi hende kier hunga mas importante cu Dios, y kier eherce autoridad y dominio falso riba hende pasobra e spirito di anticristo tey caba riba e mundo, pasobra tur caminda esey ta wordo nota.
Pero laga nos tene cuenta tur momento cu Dios ta keda Dios, pa semper y semper.
Laga nos baha nos cabes y hinca rudia.
Sinceramente, Pastor Marcel Balootje
