Denzel Dumfries a anuncia cu e lo haci un donacion di mas o menos 60 bala di futbol profesional di Adidas na AVB (Arubaanse Voetbal Bond) pa sostene e clubnan local. E strea internacional di futbol, cu tin rais Rubiano, ta riba su One Happy Island despues di forma parti di e Copa Mundial di Club di FIFA 2025 cu Inter Milan.
El a haci e anuncio special durante un ‘meet & greet’ oficial cu e representantenan di AVB, cu Minister di Relacionnan di Reino, Enseñansa, Hubentud, Innovacion y Deporte, mr. Gerlien Croes y cu e CEO di Aruba Tourism Authority, Ronella Croes.
Denzel a regresa Aruba, su hogar leu for di cas, pa regenera su alma riba suela conoci y capta kico e isla ta nifica p’e pa medio di un colaboracion special di contenido cu Aruba Tourism Authority.
Como cu Denzel ta ansioso pa duna bek n’e isla cu a yuda pa forma su carera den futbol, e ta probecha di e oportunidad pa provee e clubnan di futbol local cu balanan profesional di futbol.
“Aruba ta mas cu djis un pida paraiso, e ta un parti integral di mi herencia. E isla ta duna mi un sentido di pertenencia como tambe un impulso increibel pa salud mental. Aruba tambe a yuda mi durante mi añanan di formacion como un hungado di futbol y p’esey ta hopi importante pa mi duna bek na e isla. Pa apoya e clubnan local y hubentud local y brinda nan oportunidadnan pa crece a traves di futbol, mescos cu ami a haci”, tabata expresion di Denzel Dumfries.
Mas durante aña lo otorga AVB e balanan di futbol.
