Accion di Bario tin e meta pa incentiva e habitantenan pa reconoce cierto problema y brinda nan e hermentnan pa por yuda soluciona esakinan den forma colectivo como habitante di e barionan. Diahuebs mainta, e ekipo di Accion di Bario a bishita e bario di Jaburibari, caminda a topa cu e habitantenan y pone man hunto pa rebiba e area neglisha.
E maneho pa reforestacion di nos isla tambe ta forma parti den e programa di Accion di Bario. E reforestacion lo bira un proyecto nacional cu diferente partner formando parti di dje. Pa e motibo aki, Prome Minister a planta un mata di Fofoti na entrada di Parke Curason na Jaburibari.
Prome Minister Mike Eman ta sigui cu e meta pa reactiva e programa semanal di “Accion di Bario”.
Accion di Bario ta un programa cu Prome Minister Eman a inicia durante di Gabinete Mike Eman I, y cu a continua sagradamente durante di su di dos gabinete. Accion den Bario ta consisti di un grupo di instancianan manera DOW, Serlimar, Bureau City Inspector, GKMB, Polis di Bario y Sociale Zaken, cu hunto cu Prome Minister, ta cana den bario y atende cu varios problema cu ta encontra riba caminda publico.
Durante e ultimo 7 pa 8 aña, gobierno anterior a neglisha y bandona mayoria bario den cual habitantenan tabata sclama pa atencion social, pa e hobennan, pa parkenan di recreo y pa mehoracion di e calidad di bida den e barionan cu a keda deteriora. “Tin un necesidad grandi pa limpiesa den barionan tur rond di Aruba, y e habitantenan ta sinti cu gobierno anterior a bandona nan”, Prome Minister Eman a menciona. Ta di vital importancia pa ta cerca di comunidad, pa inventarisa e situacion den cada bario y scucha e dolornan y deseonan di e habitantenan. Hopi biaha ta cosnan chikito cu por nifica hopi y por tin impacto positivo pa e habitantenan. Esakinan ta inlcui canchanan deportivo, manera esun situa den Parke Curason, cu den pasado a construi y cu mester mantencion, e luznan, e aceranan di caya cu mester drecha, pero tambe facilita e hobennan den e barionan.
E compromiso di Gabinete AVP-Futuro, ta pa revitalisa nos barionan di manera structura y duradero pa tur hende por biba un bida digno.
