Awe abogado mr. D.Croes hunto cu hurista Duineveld a bay edificio di Corte pa entrega peticion pa un otro caso sumario di Parlamentario Mike de Meza contra Ministerio Publico.
SOLO DI PUEBLO por a compronde cu de Meza kier sa si Ministerio Publico ta cuminsa un caso penal contra di dje of no.
Por a compronde cu e abogado y hurista di de Meza, no ta haya cu Ministerio Publico a cumpli cu e sentencia anterior di Hues.
Luna pasa, Hues den su sentencia di e caso sumario di Mike de Meza contra Ministerio Publico, a ordena Ministerio Publico pa informa de Meza si e ta un sospechoso y kico ta e acusacion. Ministerio Publico a informa Mike de Meza su abogado mr. D.Croes cu Mike de Meza ta un sospechoso y a menciona un articulo di ley pa cual ta sospecha Mike de Meza.
Abogado mr. D.Croes y hurista Duineveld, despues di evaluacion ta di opinion cu Ministerio Publico no a cumpli cu e sentencia di Hues.
Awe a entrega e peticion di e caso sumario caminda mr. D.Croes y Duineveld ta pidi Hues pa ordena Ministerio Publico cumpli cu e sentencia anterior y tambe nan ta exigi pa Ministerio Publico dicidi si ta cuminsa caso penal contra Mike de Meza of no.
