ORANJESTAD – Informacion cu a yega na e mesa di redaccion di Solo di Pueblo ta indica cu Utilities Aruba N.V. ta enfrenta un problema hopi serio cu su prestamistanan (lenders) financiero internacional.
Segun fuente confiabel, e problema ta surgi despues di e nombra tres comisario den e empresa, sin cu e nombramento aki a haya pa aprobacion formal di e banconan. E situacion aki a crea tencion den e relacion cu e banconan, i por pone e stabilidad financiero di e empresa bou di precion.
Banconan internacional cu a sigui duna finansiamiento na e holding y su subsidiarionan generalmente ta exigi cu cambio den nivel di comisario of directiva pasa pa screening, pa garantisa continuidad i confiansa. Den e casonan actual, segun nos fuente, esey no a tuma luga.
E consequencianan potencial ta inclui:
Stop di liña di credito, daño na e reputacion financiero di Aruba, inseguridad pa garantia di projectonan.
Te awor aki, no tin ningun comunidado oficial for di Utilities Aruba N.V., pero segun fuente interno, ya tin banconan cu a pidi claridad urgente riba e nombramentonan.
Tur tres comisario a wordo rechasa pa motibonan di nan pasado, unda tur lo tin manteca riba cabes.
Nos ta sigui sigui e desaroyo di e situacion pa mantene pueblo informa.
