Diasabra algo prome cu mey anochi e rotonde di Tanki Leendert(Cas Casuela) cu ta conecta cu Watty Vos Boulevard tawata scenario di un accidente cu varios persona herida.
Manera informacion a drenta cu ta trata di un accidente serio, diferente unidadnan di polis y tambe ambulancenan a sali pa e sitio. Algun rato despues, dos unidad di Brandweer a yega riba peticion di Paramediconan.
E accidente a sosode momento cu e Nissan Fairlady Z biniendo cu velocidad halto di pabou ta dal e Yaris color shinishi cu tawata riba e rotonde birando e auto completamente.
Den e Nissan tawata tin un un pareha, tanto chauffeur y ocupante tawata bou influencia. Un automobilista cu tawata tras di e Yaris mesora a bati alarma, pa un accidente serio.
Segun testigonan, e chauffeur di e Nissan a baha y tawata altera tambe y lo a cuminsa haci problema sin tene cuenta kiko e la haci.
Varios persona a resulta, cuanto exactamente no ta conoci. Bomberonan mester a saca un señora for di e Yaris, debi cu tawata den su banda e Nissan a dal y ariba dje e señora aki tin problema serio cu un schouders.
Bomberonan a logra pusha e Nissan pa asina corta porta di e Yaris y saca e dama, unda cu Paramediconan a tume over.
Pa locual ta e chauffeur di e Nissan Fairlady, dado momento e la core bay drenta Cas Casuela, posiblemente evadiendo su detencion. Pero, agentenan a haya sa unda e la bay y a bay buske y sali cu ne den boei.
Van di CEA a presenta y a tume over y hibe strit warda di polis.
E famia den e Yaris tawata algun meter leu di yega nan cas cu cos di come, pero ta haya nan envolvi den un accidente serio.
Nos ta desea tur esnan herida un pronto recuperacion.
