Diasabra anochi a drenta informe di un accidente cu hende herida na e rotonde banda di Acero na Tanki Leendert, mesora a dirigi tanto polis como ambulans na e sitio. Na yegada di e patruya a bin compronde cu aki ta trata di un accidente unda cu un chauffeur burachi den un Nissan ZX a subi e rotonde sin a duna un auto di famia cu 5 hende aden preferencia y tur esnan den e auto ey a resulta herida. Debi na e impacto e auto a bira casi 180 grado. Mirando e cantidad di heridos a pidi pa 3 ambulans pa atende tur e heridonan. Mientras e chauffeur burachi lo a bay sconde den e bar den cercania pero polis a bay busk’e eynan y a detene pa a core auto bao influencia y causa accidente cu hendenan herida. Na yegada di e ambulans nan a atende e heridonan y a transporta nan pa hospital.
