Na un momento importante encuanto e scarcedad ariba nos mercado laboral, gobierno a dicidi cu pa alivia e problema aki, pa muy pronto introduci un maneho di regularisacion di personanan indocumenta na Aruba. Mirando e impacto socio-economico cu esaki lo tin pa Aruba, Conseho Sociaal Economico (SER) a entrega un conseho (adviesrapport) importante na Gobierno di Aruba, titula “Regularisacion di personanan indocumenta na Aruba un momento crucial pa un maneho di migracion sostenible”.
Funcion di SER
SER ta un organo acesor independiente, cu su funcion ta ofrece consehonan na Gobierno tocante asunto di caracter socio-economico riba nivel macro, pa yuda forma maneho cu ta promove desaroyo sostenible y bienestar general. SER su consehonan ta un resultado di dialogo social entre partnernan social (empresarial y sindical) y expertonan independiente apunta door di gobierno.
Importante: Embargo riba e documento
Ta importante pa añadi cu e conseho entrega den e SER-adviesrapport aki na Gobierno ta aun bou di embargo di tres (3) siman. Un vez e periodo aki pasa, e contenido di esakinan lo wordo publica nos website www.ser.aw.
Consehonan di SER
E conseho riba regularisacion di personanan indocumenta na Aruba ta solamente un di e varios otro consehonan cu SER a presenta recientemente na Gobierno di Aruba. Adicionalmente, un lista di otro 4 consehonan cu tambe a wordo entrega:
- Noodzaak stimulering Fintech op Aruba
(Necesidat pa stimula FinTech na Aruba)
- Naar Brede Welvaart op Aruba: Van Groei naar Balans
(Pa prosperidat amplio na Aruba: For di crecimento pa un balans)
- Aanpak Arbeidsmarktkrapte: Korte termijn aanbevelingen
(Maneho di escases di Mercado laboral: Recomendacion pa corto plazo)
- Inclusiviteit van mensen met een verstandelijke beperking
(Inclusividat di hende cu un discapacidad intelectual)
E publicacion oficial di e consehonan aki lo tuma lugar pronto riba e pagina web di SER, www.ser.aw, una vez cu e embargo stipula vence.
Pa mas contacto y informacion por tuma contact cu e Secretariado di SER Aruba na email: info@ser.aw of na telefoon: +297 5838956.
