Den un mundo yen di competencia, caminda hende kier logra tur cos, hasta a causa di otro hende , no ta importa ken nan tira abao, pa nan lanta, basta nan por broma y demostra grandesa.

Pero ora un hende ta fiel na Dios, locual tin cu bini pe lo alcanse, pasobra bendicion di Dios ta sigi esnan cu ta fiel na Dios.

Placa no ta tur cos den bida, ni tampoco hende mester confia den hende mas cu nan ta confia den Dios, bo propio sabiduria por laga bo na caya, pero ora bo ta fiel na Dios, bo exito ta sigura.

Ta cuanto cos e diabel no ta haci pa aleha hende for di Dios, pa kita hende for di nan proposito, pa pone hende bira manera yoyo, dependiendo riba material, enbes di confia den Senjor.

Ta nos tur su deber pa sinja nos yuinan depende di Dios, y no depende riba nan mes forsa, pasobra ora un hende ta fiel na Dios, Dios lo sali na su defensa. ( Daniel Capitulo 6).

Bo fieldad na Dios ta identifica ken bo ta, 

Bo fieldad na Dios ta hibabo caminda bo mester ta, 

Bo fieldad na Dios ta saca bo for di locual bo no mester ta, 

Bo fieldad na Dios ta libra bo for di locual bo no ta mira, tur plan contra bo bida ta fracasa ora bo fieldad na Dios wordo demostra,

Bo fieldad na Dios ta yega mas leu cu bo estudio, pasobra ta bo fieldad ta habri y sera porta pa bo.

Hopi biaha ora problema ta bini den nos bida, ta fieldad na Dios, ta habri porta pa nos por scapa di trampa diabolico.

Fieldad no ta cos cu hende por cumpra, pasobra fieldad cumpra ta falso, e no ta duradero, si un hende ta fiel na bo pasobra bo tin placa, e hende ey no conoce e amor di Dios.

Dios ta fiel tur momento, tanto ora nos ta den vaye, como cu ora ta nos ta riba sero, ora nos cay ta Dios mes ta yuda nos lanta, ora hende por lubida riba nos, Dios semper ta corda riba nos, pasobra nos Dios ta fiel, pesey nos tambe mester ta fiel na Dios.

E fieldad di Daniel na Dios den Daniel Capitulo 6, a pone hasta su enemigonan na su banda, pasobra locual Dios a haci ta permiti e wordo tira den cueba di leon, y demostra cu Dios por sera boca di e leon.Pasobra ora cu hende pensa cu lo no tin salida, e ora ey Dios mes ta habri un porta.

Ora un hende ta fiel na Dios e ta fiel den su matrimonio y na su famia, pasobra no ta posibel un hende ta fiel na Dios, y e ta maltrata su famia, no laga ningun hende ganja nan mes, pasobra fieldad na Dios no por wordo imita, e no ta un comedia, e no ta un wega, e ta un gran realidad.

Bo no por duna placa pa demostra bo fieldad na Dios, pasobra Dios no por wordo cumpra cu placa, tur e cos ta sinta den bo curason, pasobra ta for di bo curason bo fieldad ta sali pa Dios y pa hende.

Fieldad imita, ta wordo yama falsedad, pasobra bo ta pretende algo cu no ta den bo curason djis pa hende kere, pero serca Dios e flie no ta subi pasobra Dios conoce curason di tur hende.

Tin gran beneficio pa tur esnan cu ta fiel na Dios, Pasobra pa Dios nada ta imposibel,Dios ta semper ta na ora.

Sinceramente, Pastor Marcel Balootje