Awe, 24 di juli Horacio Oduber Hospital (HOH) a ricibi e grato noticia cu nos a wordo selecciona como un di e 81 finalistanan pa e International Hospital Federation (IHF) Awards 2025, scogi for di mas di 700 inscripcion di hospitalnan y organizacionnan for di 38 pais rond mundo.
HOH Aruba ta finalista den categoria di Seddiqi Holding Excellence Award pa Responsabilidad Social y Medio Ambiente, reconociendo nos esfuerso pa duna un bida nobo, esta haci donacion di muebel di hospital y tambe di ekipo medico na organizacionnan no comercial na Aruba. Esaki ta refleha nos compromiso cu sostenibilidad y alabes comunidad di Aruba.
“Nos ta profundamente honra cu e reconocemento di IHF pa nos compromiso cu responsabilidad social y tambe cu medio ambiente. Na HOH Aruba, nos ta di pensamento cu cuido di salud mester bay mas leu cu solamente cuido medico. E mester inclui cuido pa nos comunidad, nos personal y tambe nos isla. E nominacion aki ta refleha e trabou duro y dedicacion di ful nos team, cu constantemente ta traha pa crea un ambiente na hospital cu ta sostenibel y socialmente inclusivo. Esaki ta inspira nos pa sigui traha mas duro pa forma un sistema di cuido di salud cu ta cla pa futuro, cu compasion y uno responsabel. Nos ta honra pa representa Aruba riba un plataforma mundial y pa celebra e logro aki hunto cu hospitalnan cu ta sobresali rond mundo, pasobra Nos di HOH semper t’ey”, Jacco Vroegop, Presidente di Hunta di Directiva di HOH a expresa.
E ganadonan lo wordo anuncia durante e Ceremonia di Premiacion di IHF cu lo tuma luga riba 12 di november 2025 durante e di 48 Congreso Mundial di Hospitalnan na Geneva, Suiza. Pabien HOH y Pabien Aruba!
