Na juni 2025, Nurianne a duna un presentacion den un sesion cientifico y a representa Aruba como academico na e conferencia di CLACSO dedica na ciencia social na Latino Americano y Caribe. Mas di 28 mil persona a atende e conferencia na Bogota y mas di 300 mil a participa di forma virtual. Na e conferencia a participa mas di 7 mil persona cu a ser escogi pa duna un presentacion.
E ‘Consejo Latinomericano de Ciencias Sociales’, tambe conoci como CLACSO, ta reuni estudio di diferente area tematico cu e compromiso pa avansa ciencia social den e region Latino Americano y Caribense. E aña aki e conferencia a enfoca riba transformacion social y igualdad.
Nurianne a participa como un investigador den e area di administracion publico, cuido di salud y incapacidad. Su presentacion a enfoca riba dinamica social rond di un persona cu ta biba cu diabetes. E ta basa riba un estudio autoetnografico unda cu Nurianne a explora su propio experiencia bibando cu diabetes y incapacidad invisibel pa asina describi con sosten ta influencia e cuido propio di e persona. Banda di factor social, tambe a reflexiona riba factor cultural.
E estudio aki a duna Nurianne e oportunidad pa resalta con experiencia biba por contribui na dialogo mas amplio tocante con mester structura sosten di forma sistematico.
Como cu e investigacion aki tin como meta pa contribui na transformacion di comunidad pa logra mas sosten y igualdad, e conferencia aki a trece un oportunidad pa amplia conocemento riba estudio relevante den region. Na mes momento por a sondea con Aruba su contexto como isla chikito ta conecta cu meta regional na nivel di administracion publico y salud publico.
Nurianne ta miembro di Fundacion Diabetes Aruba, ta actualmente candidato pa PhD na Universidad di Aruba y Utrecht University, ta Vocero di Pashentnan di Aruba y miembro di Conseho di calidad di sector medico (Kwaliteitsraad). Cu e rolnan aki den mente, Nurianne a atende diferente sesion durante e conferencia pa asina trece conocemento y practica cu lo por ta relevante y beneficioso pa Aruba.
Pa lesa mas tocante e ‘Consejo Latinoamericano de Ciencias Sociales’ click riba e link: https://www.clacso.org/en/x-latin-american-and-caribbean-conference-of-social-sciences/
