Pa un sindicato sobrevivi y keda alcaso cu e lucha di trahadornan e mester keda mantene un formacion continuo, pa semper tin e generacion ni relevo presente pa tuma over, ora ta necesario. Formacion mester duna contenido na locual ta sosodiendo na nos pais y tambe kico ta pasa cu e trahadornan na nivel internacional. Formacion di lidernan no ta un proceso facil, ni barata, pero e sindicato mester cumpli cu ne. E ta costa e sindicato placa si e sindicato kier hacie bon y sigura su futuro. Un sindicato cu un liderasgo correcto ta traha cu un plan con ta gasta e placa di contribucion tur aña. Un presupuesto anual, den cual ta defini e entradanan y e gastonan cu e sindicato tin. Den e gastonan no por lubida e formacion sindical. Na inicio di añanan 90, di siglo pasa, despues cu a pone orden den finansas di SEPPA, dirigentenan di SEPPA, bao liderasgo di Gregorio Wolff, a dicidi cu 30% di tur entrada di presupuesto di SEPPA ta bay na formacion sindical.
Formacion sindical den SEPPA den pasado tabata fuertisimo.
E delegadonan di SEPPA di como 25 pa 35 aña pasa por corda, e hopi dianan di estudio cu nos tabatin tur aña, unda expertonan Arubiano y tambe di afor tabata duna lectura na delegadonan y miembronan di directiva di SEPPA, tambe na otro lidernan sindical di Aruba, den e añanan 90 di siglo pasa. Gobierno tin un ley special pa duna dianan liber na lidernan y delegadonan sindical y nos tabata haci bon uzo di e ley aki. Gobierno tambe tin bentaha ora lidernan y delegadonan sindical ta bon forma. SEPPA tabatin acuerdo cu institutonan di formacion renombra na Caracas, Venezuela. Cu ILA, Instituto Laboral Andino, tambe cu Friedrich-Ebert-Stiftung o The Friedrich Ebert Foundation. Tur dos centronan di formacion renombra cu hopi bon Formadornan. Hasta SEPPA por a tene dos seminario tur dos di un siman na Caracas, cu bastante lidernan y delegadonan di SEPPA.
Un bon formacion di e delegadonan tabata e motibo cu SEPPA tabata hopi militante e periodo ey. Semper ora lidernan di SEPPA haci un yamada pa accion, e delegadonan di SEPPA tabata presente y percura pa SEPPA ta fuerte para ariba caya pa respalda e exigencianan di nan sindicato SEPPA. Na Aruba tambe nos a organisa seminarionan Internacional cu formadornan di otro paisnan Latino-America y di Hulanda.
Manera splica e formacion mester pone den practica, cu SEPPA semper tin su lidernan prepara, tambe tin e generacion di relevo di lidernan/dirigentenan prepara pa tuma over e liderasgo den SEPPA. E lider Maximo di SEPPA no por keda mas cu 12 aña den funcion. Wolff a baha como lider maximo despues di 12 aña, esaki segun e palabracionnan.
Awe Formacion sindical den SEPPA, por bisa ta nihil o minimal. No por!!
E diferencia cu awe den SEPPA, ta manera nochi y dia, nos no ta tende, ni lesa cu tabatin encuentronan di formacion. Awe nos ta wak cu e lider maximo di SEPPA tin 25 aña den funcion, unda si nos tuma na consideracion su maneho cu errornan grandi manera:
Keda sin tene eleccion; no ta duna informacion; no ta duna formacion correcto manera e mester ta; no tin directiva pa haci e controlnan; no tin control ariba e gastamento di placa; no tin ningun sorto di plan y hopi mas asunto pa menciona.
Tur ta errornan grandisimo y no digno pa un sindicato serio manera SEPPA.
E falta di un plan di formacion pa hopi, e ta parti di un plan macabro, un plan cu tin e meta eytras pa deliberadamente no duna formacion pa no crea lidernan nobo, esta e generacion di relevo. Lew-lew e lider cu tin 25 aña na mando, ta gaña muri, esta bisando cu e no kier keda mas. Su circulo ront di dje ta bin yore y bise cu e mes mester keda. Pakico, pasobra e no a percura pa un bon plan di formacion y consecuentemente crea e generacion di relevo. Porta e lider maximo kier keda 10 aña mas, total 35 aña. Porta 20 aña mas te ora e hubila cu su 80 aña. Pa un lider keda 25 aña den e mesun funcion no ta bon pa SEPPA, cual ta nifica 13 aña stanca o tranca. Pa e persona tambe, e no ta dinamico mas, e no ta prepara su mes mas, su conocimento tambe ta tranca, e ta papiando sin fin,pero sin bisa mucho cos, esta loke nos ta yama na papiamento, e ta Tèlèlè. E organisacion ta bay di malo pa pio.
Aparentemente SEPPA no tin e lidernan forma y prepara pa lucha.
SEPPA ta un sindicato unico na Aruba cu un infrastructura tremendo, un sede sindical cu un sala di congreso pa 75 te 100 persona, un cooperativa pa su miembronan por spar y presta placa, pero SEPPA ta cayendo hopi ultimo tempo, bo no ta lesa o tende cu SEPPA tin un plan kico nan ta bay haci. No tin programa na radio manera antes, ni na Television.
Bo no ta tende nada di indexering, esta ahusta salarionan na subimento di costo di bida, e accion number UN di un sindicato cu ta lucha. Antes den e añanan 90 di siglo pasa, ta nos di SEPPA ta manda proposicion cu cifranan na Gobierno. Aña pasa, nos a ricibi informacion cu ta gobierno a yama sindicatonan den sector pubico pa papia ariba indexering, no ta sindicato a exigi negociacion. Ta Gobierno a ofrece un pakete.
Tin otro asuntonan cu ta pega ya pa mas di 20 pa 25 aña, manera e seguro medico adicional, AZV+ cu trahadornan y Pensioenadonan di Sector Publico tin y pa cual nos ta pagando un prima extra pa un pakete extra pa areglonan cualnan no ta den e pakete general di AZV, manera bril, diferente tratamento na e dientista y otronan. Tur ta igual ainda manera 20 pa 25 aña pasa. SEPPA a keda inactivo, lidernan no sa kico ta negocia.
Asina tin hopi asuntonan mas cu mester di wordo renegocia cu Gobierno.
Tur e asuntonan aki cu SEPPA no ta duna atencion ta pa motibo di un fayo grandi den formacion den SEPPA. Nos no tin lidernan forma y prepara pa lucha.
Auque cu Sra Brito tin 25 aña como lider maximo di SEPPA, parce e a perde e meta pakico e ta lider sindical y pa kico e mester lucha. Den bon papiamento nan ta bisa. E Secretario General a perde e strea di nort. Esaki ta causando un desaster den SEPPA.
Final
Nos ta spera cu miembronan di SEPPA ta bira conciente di e situacion.
SEPPA ta un sindicato cu un tremendo infrastuctura y un historia di lucha, no solamente ariba caya cu welganan y batayanan cu nos a hiba, pero tambe ora di negociacion, semper nos tabata para fuerte cu nos posicionnan husto pa e miembronan di SEPPA y pa otro trahadornan. E situacion actual den SEPPA no por persisti, mester di cambio. Tur miembro conciente cu kier pa SEPPA bay dilanti mester lucha pa un cambio. Hopi ya a declara cu nan ta dispuesto pa lucha pa e cambio pa mihor, pa cambia e situacion actual den SEPPA, pa hala un banda, un lider cu ya tin 25 como lider maximo cu no ta forma, ni prepara.
Hopi ta cu C.R.D.S, e Comision pa Restaura Democracia den SEPPA.
Ban trece formacion bek den SEPPA, pa den forma correcto y democratico crea dirigentenan nobo, e generacion di relevo pa tuma over nos sindicato.
Gregorio Wolf Michiel G. Croes
