Ta mihor cana cu hende manso y humilde, cu cana cu hende rico y malvado.
Awendia hopi no ta tene cuenta cu ken nan ta cana, especialmente si e persona tin placa of e tin poder , of autoridad, hende ta cla pa bisa e ta mi “Amigo” sin tene cuenta cu su curason.
Mayor mester splica nan yiu , esey hopi bon pasobra nos hubentud hopi biaha ta cay den trampa , y ta sera amistad cu malvado, cu ta hinca nan den trampa, manda nan haci cierto fabor y despues esun cu ta keda perhudica ta e mucha inocente, y su nomber ta wordo danja.
Hopi biaha hobennan ta tuma nan mayornan na malo, ora mayornan bisa no cana cu Fulano:
No bay su cas,
No sali cune,
No tuma nada serca dje,
No trece su cosnan na mi cas,
No keda drumi na su cas,
No fia su auto,
No tuma placa serca dje,
No ripiti su palabranan.
E malvado semper tin boca dushi, semper e ta pretende di sa mihor, un malvado semper ta bisa e mucha cu su mayornan ta vervelend, cu su mayornan ta anticua, y cu nan ta bashi, pesey nan ta envidia hende cu placa, pa asina gana e mucha su curason y hibe den caminda di perdicion.
No cunsumi pa causa di hacidornan di maldad, no sea envidioso di e malvadonan,pasobra lo no tin futuro pa e malvado, lampi di e malbadonan lo wordo paga.( Proverbionan 24:19).
Warda bo curpa for di hende rebelde,
Hende cu ta haci maldad,
Hende cu no tin respet pa Dios,
Hende cu no tin temor di Dios,
Hende cu ta troce e palabra di Dios,
Hende cu ta biba contra boluntad y principio di Dios,
Hende cu ta haci bofon di Dios,
Hende cu ta haci manera nan ta cu Dios, hunga rol di ta religioso, pero nan curason ta leu for di Dios.
Nos ta bibando den tempo dificil, caminda maldad y inmoralidad ta crece tur dia, y ta purba domina especialmente e hobennan , pone na kere cu tur cos ta placa, pa asina por usa nan como instrumento pa inmoralidad.
No tin pas pa e malvadonan Senjor ta bisa.( Isaias 48:22).
Un malvado semper ta kere cu e ta gana, aunke e ta perdi, pasobra e no por conforma su mes cu su derota, e custumbra biba den su maldad, y awor cu berdad a sali na cla te ainda e ta kere, cu su maldad por defende, y e no ta comprende cu e tin di arepenti, y busca Dios.
No pasa riba bereha di malvadonan, y no subi e caminda di hombernan malbado.
Evita esey y no pasa riba dje, hala leu for di dje, y sigi bo caminda.
Pasobra nan no por drumi si nan no haci maldad,y nan sonjo ta wordo kita for di nan wowo,ora cu nan no por haci un hende trompica.
Pasobra nan ta come pan di maldad,y bebe binja di violencia.( Proverbionan 4: 14-17).
Ma e malvadonan ta manera laman bruto, cu no por keda trankil y su awanan ta bira sushedad y lodo den laira.
No tin pas pa e malvado, mi Dios ta bisa.( Isaias 57:20).
No haci fabor pa hende malbado, nos sigi persisti den maldad, no sconde nada pa hende malbado,pasobra ora cos bira dificil, nan ta wak pa nan mes prome, y no ta interesa den bo bienestar.
Abstene for di tur forma di maldad.( 1 Thesalonisensenan 5:22).
Ta tempo pa bandona caminda di maldad, y busca amor di Dios.
Sinceramente, Pastor Marcel Balootje
