No tin nada mas dushi, cu ora nos ta obedece palabra di Dios, e ta duna nos seguridad den tur cos cu nos ta haci, pasobra ora nos obedece Dios, cielo ta di nos banda, manera e palabra ta bisa:
Si Dios ta cu nos ken contra nos.
Obediencia ta e yabi principal pa nos bida, pasobra e ta un pakete completo, den obediencia na Dios tin tur cos, pasobra obediencia ta habri tur porta, e ta un presentacion corecto, limpi y puro di tur cos cu nos ta haci, pasobra nos a pone Dios na prome lugar.
Nos bida mester ta un ehempel di obediencia na Dios, pasobra esey ta mustra cu nos ta stima Dios, pasobra e palabra di Dios ta bisa esun cu ta stima Mi ta warda mi mandamentonan y ta stima su prohimo. Ta dificil obedece Dios y no ta stima Dios.
Obediencia ta bini door di un curason cu ta stima,y kier demostra reverencia na Dios tur momento.
Mas obedecido nos ta den nos bida na Dios, mas forsa y crecemento spiritual lo tin den nos.
Hesus a contesta y a bise: Si un hende ta stima Mi , e lo warda Mi palabra y Mi tata lo stime, y Nos lo bini serca dje. Esun cu no ta stima Mi no ta warda Mi palabranan y e palabra cu boso a tende no ta di Mi, ma di e Tata cu a manda Mi.( Juan 14:23-24).
Si boso keda den Mi , y Mi palabranan keda den boso, pidi tur loke boso kier y esaki lo wordo haci pa boso. Den esaki mi Tata , ta wordo glorifica, cu boso ta carga hopi fruta y asina demostra di ta Mi disipulonan.
Nos obediencia ta senjala ken nos ta den bista di Dios, e ta un marca di bendicion riba nos bida, e ta e carta di referencia cu ta habri porta den nos bida, y pa nos tin e victoria cu nos mester.
Sin obediencia nos no ta bay ningun caminda, y ta wordo demostra cu nos ta hibando un bida di desobediencia y rebeldia dilanti di Dios, cual ta un bida cu no tin balance den ningun sentido.
Pasobra e palabra di Dios ta bisa hopi cla:Ami ta e mata di wijndruif, boso ta e ramanan,esun cu keda den Mi, y Ami den dje,esey ta duna hopi fruta, pasobra separa di Mi boso no por haci nada.( Juan 15:5).
Mi carnenan ta tende Mi bos,y Mi conoce nan, y nan ta sigi Mi.(Juan 10:27).
Pesey nos mester paga bon tino , na bos di ken nos ta scucha, pa asina nos no cay den obediencia, awendia tin hopi bos falso,
Hopi bos materialista,
Hopi bos inmoral,
Hopi bos perverso, cu ta contene masha religiosidad, pero nan curason y nan hechonan ta leu for di Dios.
Tin hopi caminda cu ta parce bunita, pero cu ta hiba na perdicion, hopi cos artificial cu no ta basa riba e palabra di Dios, pero riba emocion di hende.
Ta bon pa nos por recorda locual ta para scirbi den 1 Samuel 15:22-23 caminda Samuel ta papia cu rey Saul.bisando: Acaso Senjor tin mes tanto delicia den ofrendanan kima y sacrificionan, cu den obediencia na e bos di Senjor?
Mira obedece ta mihor cu sacrificio,y scucha ta miho cu vet di carne chubato.
Pasobra rebeldia ta manera pica di bruheria, y capricho ta manera inikidad y idolatria.
Pasobra bo a rechasa e palabra di Dios, E tambe a rechasa bo como rey.
Laga nos tur ta yuinan fiel y obedecido na Senjor Dios.
Sinceramente, Pastor Marcel Balootje
