Ta algo hopi bunita, ora hendenan ta bini hunto den grupo pa hasi oracion y gradici pa tur cos den bida. Y regularmente e grupo di Modanza ta bini hunto fielmente pa reza hunto y of celebra un anochi cu un of mas di nos Santonan y of anochinan di charla y of cantamento. Recientemente a bini hunto na Modanza pa e celebracion di Hesus, nos amigo y salbador. Pakico no ? Ariba calendario tin tur sorto di fecha cu tur sorto di Dia di esaki, dia di e saya.

Y como cu tur dia ta dia di tata tambe, nos a eligi y celebra e dia di tata aki den nos grupo na Modanza e anochi aki. Aunke e dia den e luna di Juni a pasa caba, pa nos, tur dia ta dia di tata. Tata di grupo di oracion di The Voice of Jesus 2025 a keda den persona di e gentil cabayero hoben adulto Sergio “Serge” Maduro, cu ta tata di 3 yui. Prome biaha a scoge un tata asina hoben di apenas 28 anja di edad.

E tatanan di e anjanan anterior a bin dilanti companje den laga algun blaas cora bay laira, como aprecio pa nos tata nobo. Bunita pa a wak nos mama di anja 2025 di The voice of Jesus sra. Violeta Orman gozando di e anochi aki, bandi e tata di e grupo . Lady Ruth ta gusta e celebracionnan cu alabanza, oracion y canto cu resamento na Dios pa duna danki pa bida, pa salud y pa tur otro bendicion. Nos tambe sa, cu tin Pascu, Pascu grandi, dia di resureccion etc. pero nos a goza e tema aki, di, celebracion di Hesus nos amigo y salbador combina cu dedica e anochi special aki na e tatanan rumannan den Christo presente.

Tawata un bunita anochi bao streanan na shelo den biento fresco cu a yena e curasonnan despues tambe cu dushi musica y canto pa e gran artista Victor Samuel. Victor a habri e anochi musical cu e bunita cancion gospel “Se busca” , y despues a sigui un bunita repertorio di canticanan na papiamento, spanjo y hasta nos a canta e bunita cancion Sweet Caroline. Y hunto cu Vivian nos tres a canta “Na’mi un chens” di Padu .

E anochi aki, un dushi y bunita pareha, nos mama cu tata di 2024 di The voice of Jesus Modanza, Sr.y sra. Wouters Thiel, esta, nos rumannan den Christo Anchie cu Chomon Wouters a bayla e dushi y bunita wals di Padu Lampe “Abo so” canta pa Victor Samuel. Tawata un momento masha special mes, ya cu Mama Anchie y Papa Chomon ta bay cumpli nan di 60 aniversario di boda aki mas o menos 2 luna. Un pareha ehemplar yen di amor ketobay ! Nos tambe a tribi los e heup y e pianan un crenchi.

Mayoria tawata canta hunto cu Victor, y ruman Sonia tambe, ya cu e pianan no a duna e anochi aki pe tambe los e heup y e pianan un crenchi manera ta su dushi custumber y tradicion ariba un anochi di asina hopi alegria ! Pronto mi sister Sonia lo ta bek ariba pista sigur ! Ta Sonia ta esun cu ta inspira Lady Ruth pe subi pista su so cu su so ya cu e no por sinta keto ora di dushi musica alegre cu dushi canto ! E celebracion a sigui cu algo dushi di come y bebe, un super dushi catering cu e dushi dushi bolo torta real.

Entre otro tambe e sorpresanan chikito aki aya cu atencion special ariba Papa Sergio Maduro. Nos ta manda palabranan di danki y di amor pa nos beautiful, elegante y carismatico Vidente Valerie, cu hunto cu su comision di personanan fiel y dedica na nan fe y pa bida a hasi un bunita trabao pa e dushi anochi aki, e.o. e bunita adorno di e flornan y blaasnan colorido. Danki na ruman Gilbert, Benita, Deta, Vivian, Olga, Lisette, mama Hortencia, rumannan shon Ida y su distinguida mama sra. , Linda, Isidora, Dora, Mariana y Mario, Jennifer, Buchi , Laurita, Jenny y tur otro mucho hopi pa menciona pa comparti di boso tempo precioso y hasi e celebracion aki un exito total ! Cu nos Rey y Maestro Jesus sigui drama su bendicion riba nos tur y riba henter Aruba ! Danki pa lesa nos relato, un danki special na colega escritor Jossy Tromp pa su bunita palabranan den direccion di Ruthy”Lady Ruth” cu e ta hanja falta di e relato y poemanan den e corant bon dia, cu ya pa basta tempo no ta publica nan mas pasobra nos no kier a paga nan mil y pico florin despues cu nan tambe tawata publica nan pa anjas diripiente no ta hanja nos relato di cosnan dushi social y cultural relevante mas. Pa un tempo cortiko nos relato tawata sali tambe on line di EA Earubiano news. Nan tambe kier focus riba otro noticianan, manera di polis etc. Lady Ruth a gradici bon dia y Ea netjes pa e tempo cu nan a publica di curason. Ta como colaborador nos ta skirbi y comparti di nos talentonan pa hopi anja caba y ta hasi esaki ketobay como penshonado awor y ta hanja e fantastico cooperacion di curason di Diario, Awe Mainta, Solo di pueblo y Extra Bonaire pa complace nos grandinan cu ta gusta lesa nos relato y poemanan . Nos no ta paga pa e espacio den nan prestigioso corant, y nan no ta cobra pa su publicacion. Ta algo di respet, seriedad y confianza cu e curason so por comprende y no ta tur ta pensa solamente plaka plaka plaka, danki Dios pa e comercialnan si den nan corant publica, cu ta pensa na e wowonan y curasonnan humilde y contento cu ta lesa cosnan simpel di amor y di cultura. Pasa un dushi dia yen di alegria ! Un “bearhug” pa tur !