Reunion Marisol a termina diahuebs mainta 2’or di marduga! Despues cu Marisol a reconcilia cu Andin, Howell y Maduro, y a re establece bek confiansa, e lo keda como minister pa Partido POR. Un mocion di desconfiansa ya no mester a wordo presenta, comoquiera cu e mediacion a termina cu exito.
Cu tin pas y confiansa den Partido POR, esey no kemen cu tur e alegacionnan treci dilanti dia 31 di juli, a crea un percepcion den pueblo cu e Gobierno di MEP-POR-RED ta sostene actonan coruptivo y cu ta Marisol ta e gran salvadora cu ta bringa contra corupcion.
Pe motibo ey mes, por a mira cu Fraccion di MEP den Parlamento no a traga e pilder di Marisol y a exigi di dje pe aclaria tur loke e sa di corupcion.
Marisol a nenga di aclara na prome instante y a haye forsa pa contesta:
Na final di e reunion, por a constata cu Marisol kier a haci tur lo posibel pa evita di contesta preguntanan di MEP, POR y RED. Ningun tres fraccion den Parlamento a accepta di dje e silencio ey, y den ultimo ronda di “vraag punten”, nan a bolbe ripiti como 70 pregunta cu e Minister a nenga di contesta.
Na final, Marisol a haye obliga di bay mas profundo y duna cada parlamentario nan contesta. Por a constata cu asina mes el’a keda sin contesta varios pregunta clave. E motibo cu e no por a contesta, pasobra Marisol kisas sa masha bon, cu dia 31 di Juli el’a bay hunga un wega, kisas contra Otmar, pero cu a backfire pisa riba dje. Pasobra e forma cu Marisol a trece su storianan dilanti, el’a atacha e nomber y imagen di henter gobierno.
Dia 31 di juli Marisol a bisa cu tin empleadonan na DIP, cu ta cobra mas placa cu director di DIP. Esaki ta un alegacion hopi serio, cual na final ayera Marisol no kier a bin bek riba e punto ey, trece un prueba, cu ta mustra esey.
Corupcion:
Finalmente, Marisol a bin splica cu tin hopi investigacion den DIP, unda segun cu e ta bisa, e Departamento ey ta hopi corupto mes, unda casi tur empleado ta bao investigacion. Relaciona cu casnan na Colony, a bin sali na cla, cu masha hopi empleado di DIP a fix nan mes un cas den Colony. Tur esakinan ta bao investigacion.
Director di DIP:
A cuestiona tambe, kico te rol anto di director di DIP? Con ta posibel cu tin tanto corupcion asina ta pasa bao su nanishi? E no tin un staff apto pa check e asuntonan aki?
Kehonan entrega:
Riba tur caso cu a bin dilanti, Marisol a bisa cu el’a tuma accion y a sea cuminza investigacion como tambe a entrega keho na landsrecherche como na Ministerio Publico.
Serlimar:
Marisol tambe a informa cu Serlimar a bin descubri cu e ex director, Hensley Davelaar a falsifica su diploma. Den un quick screen riba su diplomanan, a bin saca afo cu su diploma ta falsifica, unda pa colmo dos diploma ta traha na casi mes un formato, y tur dos ta contente mes un sorto di foutnan. Tur esaki a conduci cu a kita e persona aki for di trabao, pero tambe a entrega denuncia di e falsificacion di diploma.
Na final di e reunion, despues cu un mediacion a trece trankilidad bek den POR, por bisa cu e relacion ey a keda restaura. Di otro banda e show cu a wordo haci, e precepcion cu a wordo crea den pueblo cu tin corupcion den Gobierno, a keda aclara na cen chikito, ora cu Marisol por a splica ta na kico e ta referi.
Horcan den POR:
Ta notabel si, cu tur e show orchestra, ta un problema den POR, y cu ta conerni tambe varios campañadornan of coordinadornan of ex coordinadornan di e partido. Marisol a bisa cu el’a wordo preciona masha hopi mes door di ex lider di e partido.
Marisol a priminti coalicion cu e mes lo entrega tur denuncia:
Na ciere di reunion, Marisol a asegura MEP-POR-RED na varios ocacion, cu nan por ta sigur di su persona, cu tur loke e haya di cosnan iregular, e lo tuma accion y entrega keho.
