Dialuna Minister di Salubridad, Asuntonan Social, Cuido di Adulto Mayor y Maneho di Adiccion, drs. Melvin Wyatt-Ras a ricibi bishita di Su Exelencia Sra. Diana Carolina Olarte Bácares, Embahadora di Colombia na Hulanda, Sra. Patricia Cortés Ortiz, Directora Europeano di Relacionnan Internacional di Colombia, Sr. Gustavo Serrano Amaya, Consul di Colombia na Aruba, y tambe Sra. Betsy Suárez Cáceres, Consehera di Embahada Colombiano na Hulanda.
E reunion a tuma lugar den presencia di varios funcionario di gobierno, incluyendo representantenan di Dienst Buitenlandse Betrekkingen y consehero di Minister.
Durante e bishita, Minister Wyatt-Ras a enfatisa e lasonan estrecho cu Aruba tin cu e comunidad Colombiano, reconociendo e aporte importante cu nan a duna na e desaroyo di Aruba y cu nan ta forma parti esencial di nos comunidad.
“E relacion aki ta fuerte y valioso. Nos mester sigui fortalece esaki,” Minister a bisa.
E intercambio a enfoca tambe riba diferente tema importante, entre otro:
- Cooperacion y colaboracion medico, particularmente relaciona cu referencia di pashentnan via AZV pa tratamento na Colombia
- Dialogo riba otro tereno medico y social, incluyendo salud mental, adiccion y cuido di adulto mayor
- Maneho di importacion di carni, cu e meta pa actualisa regulacionnan y posiblemente amplia importacion di otro productonan for di Colombia
Minister Wyatt-Ras a expresa tambe su aprecio pa e red di contacto cu Aruba tin actualmente cu Colombia y a subraya cu tin hopi espacio pa intercambio y asistencia entre nos paisnan:
“Nos ta habri pa colaboracion structural y integra, cu por beneficia tanto nos pueblo Arubano como e comunidad Colombiano aki na Aruba.
E bishita aki a sirbi como un paso mas den e fortalecemento di e lasonan diplomatico y humano entre Aruba y Colombia.
Minister Wyatt-Ras a reafirma su deseo pa sigui cultiva colaboracion activo cu paisnan Latino Americano den beneficio di Aruba.
