Dialuna ultimo, Minister di Finansa, Asunto Economico y Sector Primario, mr. Geoffrey Wever, a tene un encuentro importante cu Sra. Carolina Olarte Bácares, Embahadora di Colombia pa Reino Hulandes, Sra. Patricia Cortes, Directora Europeo di Emabahada di Colombia, Sr. Gustavo Serrano Amaya, Consul di Colombia y Capitan di e Buque ARC Gloria, Sr. Luis Fernando Lara Coqollo.
E reunion ta forma parti di un esfuerso di Gobierno di Aruba pa profundisa e relacion existente y formalisa cooperacion structural cu Colombia riba importancia strategico manera comercio, logistica maritimo y desaroyo di e sector primario.
“Nos kier traha riba un base concreto pa mehora importacion y exportacion, pa beneficio di negoshinan chikito y pa crea mas oportunidad pa empresarionan Arubano,” Minister Wever a bisa.
“Aruba su presencia permanente mediante Holland House na Bogotá y e interes creciente di empresanan Arubano pa haci negoshi cu Colombia ta refleha un deseo real pa expande nos laso comercial cu e pais bisiña. E misionnan comercial exitoso na 2023 tabata solamente un comienso,” Minister Wever a sigui bisa.
Aruba kier relansa e cooperacion den e sector primario, specificamente riba importacion di carni, industria di pesca y coneccion mas frecuente y structura via lama cu Colombia. Esaki ta brinda oportunidad pa Colombia tambe pa por haci uso di Aruba, como e isla mas cerca di Colombia, pa drenta otro islanan den Caribe y expande nan mercado.
Di acuerdo cu e Programa di Gobernacion AVP-FUTURO riba e punto pa diversifacacion di economia, un di e puntonan principal ta e deseo pa purba yega na un tratado pa elimina dobel belasting entre Aruba y Colombia—un paso cu lo habri porta pa inversionnan y pa un fluho mas liber di capital, producto y servicio cual lo percura pa mejora e comercio den region.
Embahadora Olarte Bácares a expresa su interes continuo pa fortalece e relacion cu Aruba, indicando e potencial real pa cooperacion riba tereno comercial, logistica, produccion, turismo y deporte.
Minister Wever a conclui cu e encuentro ta otro paso firme den un rumbo di crecemento, sosten y integracion regional. Un cooperacion structural cu Colombia no ta solamente strategico, sino tambe necesario. Aruba mester diversifica su economia y fortalece su coneccion regional pa sigui avansa.
