Diamars mainta, durante un ceremonia oficial na Colegio EPI, Minister di Educacion, mr. Gerlien Croes, a enfatisa riba e rol fundamental cu educacion tin den forma un futuro laboral solido y sostenibel pa Aruba. E evento a marca e firmamento di un acuerdo strategico entre ATA, EPI y SEPB, pa un colaboracion clave cu ta enfoca riba stimula y eleva e nivel di educacion culinario na Aruba.
Un iniciativa como un paso strategico den direccion di un sistema educativo mas conecta cu e necesidadnan real di e mercado laboral y e aspiracionnan di nos hubentud. “Nos mester ofrece na nos hobennan un educacion cu ta relevante, inspirador y cu ta preparanan pa e mundo real. E aliansa aki ta mustra con, hunto, nos por crea oportunidadnan cu ta impacta positivamente e bida di nos studiante y e futuro di Aruba”, Minister Gerlien Croes a expresa.
Minister Gerlien Croes a indica cu e crecemento continuo di nos sector turistico — particularmente den gastronomia y hospitalidad — ta crea un urgencia pa desaroya y forma talento local di calidad. E Plan pa Stimula Educacion Culinario 2025 ta inclui tayer practico, experiencia internacional, evento pa studiante y lesnan innovativo, duna door di profesornan y expertonan di e industria.
“Nos educacion mester garantisa un brug entre scol y e mundo laboral”. E Plan Culinario ta precisamente esey: un proyecto educativo cu ta empodera, inspira y prepara. Esaki ta un ehempel di con nos por integra educacion, hubentud y industria pa crea un Aruba mas fuerte”, Minister Gerlien Croes a agrega.
Ministerio di Educacion ta compromete pa sigui traha den direccion di un sistema educativo moderno, inclusivo y conecta cu e realidadnan di manañ — un sistema cu ta capacita nos hobennan pa keda na su pais y contribui cu orguyo na su desaroyo. Un gradicimento na ATA y colega Minister di Turismo sr. Cicilia como partner strategico di e iniciativa aki. Minister Gerlien Croes ta keda subraya e importancia di educacion como base pa desaroyo di e futuro laboral di Aruba.
