Laga nos cuminsa bisa danki pa tur e bon comentarionan ricibi pa cu mi dos poemanan abstracto largo cu hopi berdad den nan. Moda y Bon manera ta topiconan di tur dia y nos ta biba cu sintimento di pueblo ora di inspira nos poemanan. Nos no ta skirbi “mushy mushy “ so, elogia y eleva cosnan ora ta bon y bunita. Ora cos por mihor tambe nos ta inspira di nan. No ta tur hende ta stima Lady Ruth kizas den e momentonan ey, pero despues di a pensa bon y reflecciona nan tambe ta yega na e conclusion cu tin berdadnan den nan.
Pa esnan cu a lesa nos relatonan di hopi anja atras, sa, cu nos a guerra un crenchi cu e revista Exclusivo tocante e topico di moda ora nan a skirbi algo di Lady Ruth cu no a cai na bon tera. Mi contesta tawata, cu, no ta ningun hende nan asunto ki ta cumpra ki ta bisti, nan no tin arte ni parte den e cartera di ningun persona. Nos no tawatatin ni tin nunca berguensa pa bisa cu nos ta gusta cumpra panja ora tin baratiyo. Nos ta prefera di sali come den restaurant luhoso y biaha conose mundo un crenchi, inverti placa aki den, enves di core cumpra shimis color di oro, pasobra un of mas eyfornan ta bisa cu oro ta na moda.
Naaaaaaah, nos ta sigui nos mesun curason, nos mesun gusto. Awe nos ta manda deseonan di pronto recuperacion pa e directora donjo di e revista Exclusivo sra. Jackelyn Wernet cu segun nos a comprende ta na Colombia pa tratamento pa cu su salud. Nos no sa si su revista ta on ainda of no, pero nos tur ta corda Jackelyn como e bunita presentadora di noticia na e canal 15 di atv anjanan atras. Un cara bunita, un curason expresivo y un bos unico. Enfin, despues di hopi tempo ata nos den un otro revista, nan tambe a bay digitalmente on line cu nan bon temanan y si, temanan di moda tambe, pero, esey ta keda na kada ken. Cu respet. Nos ta den Focus Digital, pasobra nos a hanja e entrevista hopi leuk mes, e preguntanan cu nan a puntra Lady Ruth.
Danki na e team di Focus, especialmente sra. Aurora “Auri” Dijkhoff pa a aserca nos y laga nos luci un crenchi. Mi a hanja e oportunidad di comparti mi mensahe tambe cu pueblo lector di e revista bunita aki. Un otro cos bunita cu nos a hasi ta cu recientemente mi casa cu mi a hiba Payo, mi tata, bebe un dushi Aruba swing koffie y come un dushi crab salad na Coffee House pa share quality time cu otro. Ta un bendicion gigantesco pa tin nos mayornan cu nos. Nan ta nos role modelnan den amor y atencion. Nan consehonan cu semper a yuda nos den tur cos. Nos amor pa nan ta grandi ! Danki Papa, danki Mama ! Un brasa pa Mama ! Recientemente tambe nos a bay Djiespies happy hour atrobe, mi casa cu mi, y nos a topa cu nos bunita amiga Monica cu su bunita smile y tambe Liki Perez cu ta traha cu nos hendenan special cu un of otro limitacion y nos a combersa agradabelmente tocante su amor, atencion y dedicacion na esaki ya pa hopi anja. E tawata presente e anochi aki cu un grupo bastante grandi pa goza di e dushi musica di Robert Maduro y Azucar.
Nos a bayla un wals y a bay tempran pa cumpli cu otro compromiso. Nos a comprende cu despues nan a toca e cancionnan mas bunita cu publico ta gusta bayla den grupo grupo, ora no tin pareha pa bayla. Jammer ! No tur ora save the best for last, purba cumpli cu tur cu no tur ora por keda te ora e happy hour aki caba. Ta algo cu tur banda musical ta hasi, warda pa mas laat. Ufffff……Danki lieve Wim, pa saca potretnan bunita di esnan den publico presente.
Ah si ! Nos tawata den entrevista na radio Hit 94 FM cu e gentil cabayero Junior Dorotaal tambe recientemente, kemen, como penshonado adulto mayor toch nos tawata bastante activo atrobe.
Nos a topa eynan cu un cabayero conosi pa mi fey enjanan nobenta ney na radio Galactica FM e guapo Win Donata, still going strong cu su otro ocupacionnan bunita y profesional. Contento di a topa’bo despues di hopi tempo ! Nos a hasi conosi tambe cu un hoben adulto cu fam Feliciano si mi no tin hera . Dushi pa a combersa un crenchi tambe cu Julissa di Hit 94 fm cu ta maneha e departamento administrativo. Ta manera Johnny Habibe tawata presente cu nos den e oficina. Serca di nos mente, alma y curason. Su 3 yiunan ta trahando duro den un bon direccion pa sigui cu e emisoranan Hit 94 y Mega 88 FM. Cu bon y bunita musica y entrevistanan regularmente. Stan Dabian y Morgan Arrindell cu nan bunita programa” un Cita cu”.segun mi ariba Diasabra mainta. Lady Ruth tawata regularmente den e noticiero tambe, tempo di Johnny awe dfm.
Y lieve Astrid cu su programa na Mega 88 fm, Cu Astrid, bisa’mi. Y mas. Shonnan, masha danki pe atencion di curason atrobe. Pasa un dushi dia y un bon siman colma di salud, alegria y sabiduria. Un “bearhug” di Ruthy “Lady Ruth”
