A yega tempo pa nos busca pa sa e boluntad di Dios, di henter nos curason, pasobra hende no por sirbi Dios manera nan kier, Dios ta Todopoderoso, Divino, Santo, Puro, y Berdadero, y e merece mas di locual nos por ofrece , den un palabra bisa, Dios ta tur, pero tur cos pa nos.
Nada ta scondi den Su presencia, serca Dios nos no tin bida priva, Su lus di berdad ta penetra tur caminda, Dios ta samina curason di hende, y conoce cada intento di nos pensamento,e conoce nos di paden bin pafo, y e ta controla nos curason.
Ki bon y ki bunita ta, ora nos obediencia na Dios ta funciona completa mente, y Dios su nomber , wordo halsa tur momento den nos bida, pasobra locual hopi hende no sa ta , cu nos actitud ta halsa nomber di Dios, pasobra cu nos actitud nos ta demostra cu nos ta sirbido di Dios.
Nos no ta sirbi Dios solamente cu palabra, pero cu hechonan agradel den su presencia, dunando bon fruta di Fe y Perserverancia, cu ta identifica nos como yiunan di Dios.
Laga tur hende corda cu ta dificil of mihor bisa imposibel pa sirbi dos Dios, pasobra hopi a haci esey y hopi te ainda ta purba haci esey, pero e resultado no ta beneficioso pa nan bida.
E palabra di Dios ta bisa den e buki di Santiago 4:7 :
Pesey somete boso na Dios.
Resisti e diabel y e lo huy for di boso.
Hala serca Dios y E lo hala serca boso, limpia boso mannan , boso pecadornan, y purifica boso curason, boso di curason.
Santiago 4:10 : Humiya boso mes den e presencia di Senjor y e lo halsa boso.
Nos no por tin un curason artificial, sirbiendo un Dios cu ta bibo, y real, awor aki nos a drenta un tempo di Inteligencia Artificial, cual por wordo usa pa bon. Pero nos mester keda vigila e enemigo.
Pero ora ta yega na nos Dios, puro santo y berdadero, E no ta acepta nada artificial, solamente cosnan cu ta sali di un curason puro y berdadero ta wordo acepta den Su presencia.
No laga nos lubida con Dios a rechasa e ofrenda di Cain, y halsa esun di Abel, pasobra Cain a pensa cu Dios ta acepta cualquier ofrenda. Laga tur cos cu nos ta haci pa Dios ta un sacrificio, algo cu ta costa nos.
Pesey mi ta roga boso rumannan, , pa medio di e misericordianan di Dios,pa presenta boso curpanan como un sacrificio, bibu y santo,aceptabel pa Dios, cual ta boso sirbishi spiritual di adoracion.No sea conforme e mundo aki, ma sea transforma, pa medio di e renobamento di boso mente, pa boso por comproba kico ta bon y agradabel y perfecto boluntad di Dios.( Romanonan 12:1-2).
Dios ta Santo y E ta biba den Santidad, y ta nos mester acomoda, adapta, sincronisa nos bida, den Su perfecto boluntad, pa asina nos por agrada Dios den tur cos.
E ora ey Hesus a bisa su disipelnan, si un hende kier bini Mi tras, laga e ninga su mes,y hisa su crus, y sigi Mi.
Ora un hende ninga su mes y gara na Dios, diabel no tin caminda pa gara nada den bida di e persona ey;
Pasobra tur loke e ta,
Tur loke e tin,
Tur loke e ta bay tin , ta den e man di Dios, pasobra su dedicacion na Dios, y su Fe den Dios ta move mannan poderoso di Dios.
O, Dios laga nos comprende.
Sinceramente, Pastor Marcel Balootje
