Den un entrevista cu Top FM 95.1, parlamentario di MEP, Hendrik Tevreden, a duna su opinion riba e “grip” di Hulanda riba paisnan den Caribe Hulandes, uzando e Status Aparte di Aruba como un ehempel di exito.
Segun Tevreden, e control di Hulanda riba paisnan manera Corsou y Sint Maarten a crea un situacion dificil y a stroba nan desaroyo, mientras cu autonomia a duna Aruba e oportunidad pa florece economicamente.
E Efecto di e Grip Hulandes
Tevreden a cuminsa su declaracion door di menciona con, desde 10-10-10, Hulanda a probecha di un situacion pa pone un control mas estricto riba Corsou y Sint Maarten. El a cita e situacion na Boneiro, cu a bira un municipio di Hulanda, como un “mal desicion” den bista di hopi Boneriano cu ta sinti cu nan a perde nan isla. E parlamentario a señala e dificultadnan cu Corsou ta enfrenta pa tuma decisionnan economico independiente, y e situacion critico di Sint Maarten cu, a pesar di tin fondonan millonario, no por finalisa e reconstruccion di su aeropuerto pa motibo di e burocracia y e “grip” di Hulanda. Tevreden a splica cu e falta di conocemento di e sistema local y e intento di impone e sistema di Den Haag ta causa hopi problema y retraso.
Autonomia: E Clave pa e Exito di Aruba
Opuesto na e paisnan aki, Aruba tin un storia di exito desde cu el a ricibi su autonomia na 1986. Tevreden a contradeci e idea cu “autonomia no por come,” bisando cu e crecemento economico y turistico di Aruba, cu a bira e fundeshi di nos entrada, ta un regalo di e Status Aparte. Segun e parlamentario, e lucha pa autonomia a percura pa Aruba por a para riba su mesun pia, specialmente ora Hulanda a pensa cu Aruba lo bin bek “na rudia” despues di 1996. Den e añanan despues di 1986, Aruba a tuma pasonan firme y fuerte, scogiendo pa desaroya su turismo y dirigi su mesun economia pa bira exitoso.
Tevreden a termina bisando cu e punto cu e historia di Aruba ta un prueba cu autonomia ta un bendicion. E mesun autonomia cu a wordo ricibi, a percura cu Aruba por a desaroya un economia robusto, un Parlamento propio y su mesun presupuesto y por dicidi pa su mes e rumbo cu e pais ta tuma. Esey ta e diferencia entre un pais cu ta pidi “un bureau, banki di scol, borchi di scol, pen cu potlood” y un pais cu ta dirigi su mes cu exito.
