Minister Geoffrey Wever ta anuncia cu concepto di ley pa modernisa permiso di negoshi ta cla y entrega pa e trayecto huridico por start. Hunto cu cooperacion cu Hulanda via di e Landspakket, e cambio di ley pa permiso ta forma parti di un di instrumentonan di maneho economico pa optimalisa e proceso di permisonan. Via landspakket Hulanda a financia e trabao huridico pa traha e concepto ley pa modernisa permiso di negoshi.
Negoshinan chikito y grandi ta forma e fundamento pa crecemento y desaroyo economico di Aruba. Cu digitalizacion di tur peticionnan pa permiso pa negoshi y modernisacion y publicacion di “Beleidsrichtlijnen Vestiging van Bedrijven”, awor riba iniciativa di Minister Geoffrey Wever, e ley pa permiso “Vestigingsverordening” lo wordo adapta pa stimula mas comercio na Aruba.
Cambionan di ley ta entre otro (1) pa crea e base legal pa tur peticion wordo entrega digital, (2) haci e periode dentro di cual un permiso di negoshi wordo duna mas cortico, (3) cu no mester aplica pa un directeursvergunning mas, (4) no lo tin e toets obligatorio na Camara di Comercio cu lo acelera e tempo dentro di cual un permiso di negoshi ta wordo duna, (5) lo introduci instrumentonan legal pa controla si negoshinan ta cumpli cu ley di permiso di negoshi y cu por duna boet si esaki no ta e caso y (6) tambe ta haci posibel pa introduci un moratorio riba negoshi of limita cierto negoshinan den barionan specifico.
E cambionan aki den e ley di permiso pa negoshi lo baha e tempo e permiso di negoshi lo wordo otorga, ta elimina mas “red tape” posibel y lo mehora e clima di inversion pa asina tin mas comercio na beneficio di Aruba su economia y desaroyo. Ta premira pa e ley nobo pa permiso di negoshi drenta na vigor na comienzo di 2026 segun minister di Finansa, Asunto Economico y Sector Primario Geoffrey Wever.
