Parlamentario Endy Croes a cuestiona minister Gerlien Croes kende porcierto a conkista e apodo di Serafina den Jet. Gerlien Croes kende tin apenas 120 dia como Minister tin un total di 30 dia den exterior riba biahenan di trabou riba custia di pueblo.
Nos ta mira cu tin espacio pa reduci gastonan di Gobierno:
Partido Futuro den nan programa riba pagina 7 a splica kiko ta nan vision.
Den nan vision Futuro ta mira cu tin espacio pa reduci gastonan di gobierno. Esaki nan mes a skirbi den nan propio programa riba pagina 7.
Kiko ta nan accionnan pa logra esaki? Nos lo splica con Gerlien cu Geoffrey ta reduciendo gastonan di gobierno manera nan mes a priminti.
Futuro a cuminsa biaha rond mundo pa loco:
Gerlien cu Geoffrey a cuminsa biaha rond mundo pa loco. Asina nan ta interpreta reduccion di gasto. Geoffrey recien tabata na Washington y despues un luna na Europa cual e ultimo nos a compronde cu e lo tabata cu vakantie. Pero Gerlien mientrastanto a biaha bay Hulanda den luna di juni ultimo pa reuni cu un Federacion di Baseball. Hulanda a manda cancela e reunionnan oficial cu gobierno Hulandes momento gobierno di Hulanda a cay pero toch Gerlien a sinti necesidad pa malgasta 45 mil florin biahando den Business Class pagando VIP room na airport Hulanda, paga hotel caro mas ‘daggeldvergoeding’ hunto cu Speed vocero di gobierno pa reuni cu un federacion. Estupendo! Nos no ta lubida con Speed a grita Gerlien na radio cu Marisol a bay Gerlien a bin y cu Gerlien ta pio cu Marisol. Accion di Gerlien ta pa laga hala Speed aden mesora y cu un biahe ta net locual Speed gusta. Despues Gerlien a sinti e necesidad pa bay Republica Dominicana pa apoya un yiu cu a bay hunga cu un team di baseball. Como Mama y/of mayornan nos ta compronde y ta sostene esaki pa brinda ‘support’ na bo yiu. Pero e manera cu esaki a bay nos ta cuestiona. Gerlien a regla esaki di tal manera cu Gerlien lo ricibi un plakaat na Republica Dominicana pa asina e por yama esaki un ‘dienstreis’ y laga pueblo paga tur cos tanto biahe, hotel, daggeldvergoeding. Lamentablemente e otro mayornan cu tame a bay no tabata tin e luho aki paso nan si mester a paga tur cos di nan propio saco. Gerlien a pisa tera despues y a sali mesora pa Paraguay y broma cu un logro cu Tele Aruba lo pasa e weganan di ‘Junior PanAm Championships’ na Asuncion Paraguay gratis. Pues e ‘streaming’ cu ya caba ta gratis el a logra pa Tele Aruba pasa esaki gratis. Locual a acapara nos atencion ta cu Gerlien gusta biaha. Kisas e tin hopi aña sin por a drenta merca y awor kier probecha.
Serafina den Jet Gerlien Croes:
Notable ta cu Gerlien den apenas 120 dia di trabou (4 luna) tin 30 dia (1 luna) den exterior riba custia di pueblo. Mientras Enseñansa ta roga pa ayudo awor cu aña escolar ta bay inicia, mientras docentenan ta warda riba un decision politico pa cu e mehoracion di nan salaris, mientras e conseho ta cla y e placa te’y pa logra esaki, Gerlien ta sinti cu e prioridad pa biaha riba custia di pueblo ta prevalece y ta bay promer. Pa e rason di gusta biaha pornada Gerlien a gana e apodo “Serefina den Jet”. Nos ta spera cu Gerlien por keda Aruba awor y cuminsa traha di berdad pa sirbi interes general di pueblo promer cu su interes personal.
