Scol ta bay habri, muchanan ta pidi tur cos di moda, nan kier keds di marca, Puma, Nike, y otro marca conoci, y mayornan cu no por cumpra esey, ta man na cabes pa convence e mucha cu nan no por alcansa nan peticion.
Como hoben nan kier luci riba e prome dia di scol, mustrando cu nan ta bon bisti, y cu nan tin tur cos.
Pero tin un cos cu mester tene bon cuenta cune awendia, y cu mayor mester sinta tras di e mucha pa su bida ta na ordo y esey ta e mucha su conducta.
No tin nada mas bunita, ora un hoben tin bon manera, y ora e ta respeta su mes y ta respeta otro nan.
No tin nada mas bunita ora un hoben por comunica decentemente cu otro sin papia palabra malo.
No tin nada mas bunita ora un hoben por bisti decente.
No tin nada mas bunita ora un hoben su conducta ta decente y esey ta pone cu hende grandi tin respet pe.
Pasobra bon conducta di un hoben ta e testimonio cu e sali for di un cas di respet y bon comunicacion.
Pasobra bon conducta di un hoben ta demostra cu su mayornan a instrui e den e caminda di Dios.
Pasobra bon conducta di un hoben ta su carta di referencia na unda cu e bay, y porta lo habri pe.
Awendia den hopi caso , mayor ta cria yiu con cu ta, sin amor y sin respet y despues nan kier saca bon conducta for di dje.
Pero e gran pregunta ta bini awor: Con e mucha por demostra algo cu e no a ricibi?
Si e mucha ta mira na cas, cu su mama mes no ta bisti decente,ni tampoco su vocabulario ta limpi y su tata no ta respeta su mama, tampoco ningun hende den cas, con bo ta kere e mucha ey su conducta por ta bon?
Mundo ta yen di maldad, yen di inmoralidad, tur caminda, den cas ,na television, riba internet,riba caya, tur caminda tin mal influencia, hasta tin hende grandi cu ta dedica nan mes na danja nos hubentud cu droga y alcohol.
Locual ta malo ta mas serca cu hopi hende ta kere, y locual ta bon ta manera algo stranjo, awendia si un hende ta haci bon , papia cu respet, pidi despensa, y yuda otro e ta keda manera e ta un hende di otro planeta.
Den 2 Timoteo 3:1-5 Pablo ta papia di temponan trabahoso, pero tin algo bunita den 2 Timoiteo 3:10 bisando Timoteo cu tempo por bira malo, ma abo: sigi mi sinjansa, conducta, proposito, amor, perserverancia.
Den esey e kier spierta e hoben Timoteo, pa no bay tras di e mal influencia nan cu ta moviendo riba mundo, pero sigi den e bon caminda cu e mes como Pablo a sinja Timoteo.
Y ta esey ta e unico garantia cu nos como mayor tin awendia, ora nos mes tuma tempo pa guia nos yiu den e bon caminda, pasabra si nos instrui e mucha for di chiki, na grandi e lo no aparta for di locual e a sinja.
Como mayor bo no tin back up di nada, solamente di e palabra di Dios pa instruccion di bo yiu,no bay confia cu internet, y facebook, lo ta parti di educacion di bo yiu, no bandona e mucha den man di su telefon, pasobra e enemigo a drenta den tur locual ta digital, y hasta den un simpel wega por tin contaminacion.
Laga nos haci hopi oracion pa nos yuinan.
Sinceramente,Pastor Marcel Balootje.
