David a bisa; lo mi halsa mi wowonan na e serunan for di unda mi yudansa lo bin?
Mi yudansa ta bin for di Senjor, Kende a traha cielo y tera.( Salmo 121:1-2).
Bo no sa? Bo no a tende?
E Dios Eterno, e Senjor, e Creador di e finnan di tera, no ta bira cansa ni fatiga, Su comprendemento ta inscrudinjabel.
E ta duna forsa na esun cu ta cansa, Y e ta aumenta poder , pa esun cu ta falta poder.
Hoben mes ta bira cansa y fatiga, y hobennan cu vigor ta trompica pisa.
Ma esnan cu ta spera riba Senjor , lo hanja forsa renoba, nan lo bula bay ariba cu hala manera aguila, nan lo core sin bira fatiga, nan lo cana sin cansa.(Isaias 40:28-31).
Mi tabata jong, y awor mi ta bieu, ma nunca mi a mira e husto desampara, ni su decendiente ta pidi pan. Semper e ta misericordioso y ta fia,y su decendientenan lo ta bendiciona.( Salmo 37:25-26).
Confia den Senjor cu henter bo curason,y no depende riba bo mes comprendemento. Den tur bo camindanan reconoc’E, y e lo dirigi bo berehanan.( Proverbionan 3:5-6).
Nos hubentud mester di encurashamento, nos hubentud mester di ayudo, pasobra di nan ta confia den forsa di hende, den forsa di media, den forsa di internet, nan no tin e Baranaca Fuerte cu ta Cristo Hesus den nan curason, y ta pesey hopi biaha nan ta tuma decision incorecto cual despues nan mes ta lamenta y mayornan tambe ta keda cu e dolor.
Hopi no ta compronde cu confiansa den Dios, ta trece pas pa nos bida, confiansa den Dios, ta trece e harmonia necesario, cu ta yuda nos cana tur caminda sin cansa, pasobra , nos no ta riba nos mes, pero nos confiansa ta den e Todopoderoso, no den placa, ni tampoco hende, pasobra nos tin cu sinja nos hobennan cu ta Dios ta donjo di tur cos.
E sistema di mundu tin nos hobennan gara, y solamente palabra di Dios, por losnan for di e structura di maldad, cu dia pa dia ta preta nan bida, pesey e evangelio mester wordo predica,no tin nada mas bunita cu e Evangelio di Dios.
E palabra di Dios ta bisa den Mateo 11:28-30: Bin serca Mi tur cu ta cansa y carga, y lo Mi duna boso sosiego. Tuma mi yugo riba boso, y sinja di Mi,pasobra Mi ta manso y humilde di curason, y boso lo hanja sosiego pa boso alma. Pasobra Mi yugo ta suave y mi carga ta lihe.
Nos hobennan mester sa cu no tin forsa den droga y alcohol, no tin forsa den canamento cu arma, no tin forsa den rabia, violencia y odio, pasobra rabia no ta obra pa husticia di Dios.
Tampoco no tin forsa den palabra malo, ni tampoco ningun acto vulgar, ta tempo pa nan busca e solucion berdadero y su nomber ta Cristo Hesus, e ta nos unico speransa, e ta nos refugio y nos Baranca fuerte.
Pablo ta bisa bon cla den 1 Corintionan 1: 26-29 especialmente pa nos hobennan awendia sa cu Dios por haci cos grandi den nan bida, y cu nada no por stroba Dios.
Ma Dios a scohe e e cosnan bobo di mundo pa brongosa e sabinan. Dios a scohe e cosnan debil di mundo pa brongosa e cosnan cu ta fuerte. E cosnan baho di mundo y esnan despresia, Dios a scohe e cosnan cu no ta nada , pa E haci e cosnan cu ta algo bira nada.Pa ningun hende no gaba dilanti di Dios.
Sinceramente, Pastor Marcel Balootje
