Recientemente un medio di comunicacion a lansa un noticia cu ta parce di ta scondi, unda un polis y su casa nan nomber a wordo menciona, relaciona cu asuntonan di droga. E noticia a menciona cu a wordo haya droga na e cas di e polis, of na unda e polis ta biba, cu tin di haber cu gulido di bolitas. Segun e pagina di noticia, e noticia aki wordo scondi y tin rapportnan cu tambe a wordo scondi. E informe publica a obliga hefe di polis sali afo pa confirma cu e polis a wordo investiga, pero no a haya nada cu ta incrimina e polis, maske droga a wordo haya unda e ta biba.
Loke e comunicado di hefe di polis no a menciona tabata: Ken a haci e investigacion? Departamento di polis mes of landsrecherche? Of ta Bizo?
Normal ora un polis wordo liga na algo, ta landsrecherche mester haci e investigacion y den e caso aki, aparentemente esey no te caso. Esey mas cu claro por a trece hopi duda serca dicho medio di comunicacion. Nos a compronde cu e medio a aserca polis pa un wederhoor, pero polis no a haci uso di e oportunidad y a keda den silencio. Ora e noticia a sali, polis y hefe di polis a bira loco, y cual caso a termina awor den keho penal contra un periodista pa cual e periodista a wordo cita na ministerio publico pa un tom zitting.
Con ta posibel? cu e mes ministerio publico cu no tin tempo, ni personal pa atende kehonan di difamacion, awor si, dor cu ta trata di un polis ( rabia), awor si e keho a cana den forma di fasttrack?
E cosnan aki ta crea duda y mas duda den polis y den Ministerio Publico. Ora ta polis, accion rapido, ora ta cuidadano, no por actua, pasobra no tin personal. Pues un descriminacion grave den husticia y ta mustra cu bo ta haya husticia depende di bo categoria. Si bo ta polis bo ta prome categoria, si bo ta cuidadano normal, bo no ta conta.
E tipo di trato aki merece wordo hiba mas leuw, pasobra cada ken mester por conta riba husticia y husticia no mag di atendebo si bo ta polis, y si bo ta cuidadano normal, ta nenga bo caso.
