Tur dia no ta mesun dia, y tur dia no ta mesun cos, tin hopi situacion den bida, cu nos tin cu enfrenta tur dia, y mayoria biaha nos por no por hacie nos so, pero e man invisbel di Dios, e poder di Dios cu ta sostene nos tur momento, ta haci cu nos ta para riba pia pa duna danki, alaba y reconoce cu ta Dios a hacie pa nos.
Den Isaias 41:13 Dios ta duna nos un seguridad asina grandi cu nada na mundo no por compara cune.
Bisando: Pasobra Ami ta Senjor bo Dios, Kende ta sostene bo man drechi , Kende ta bisa bo no tene miedo, lo Mi yuda bo.
Pero den Isaias 41:10 E ta cuminsa anticipa nos cu pone miedo un banda bisando:
No tene miedo,pasobra Mi ta cu bo, no desmaya, pasobra Mi ta bo Dios,Lo mi fortalese bo.si lo Mi yuda bo, si lo Mi sostene bo cu Mi man drechi di husticia.
Si nos tin famia y amistadnan cu nos ta confia ta algo bunita, pasobra Salmo 133 ta expresa esey pa nos biba den harmonia cu otro.
Nos confiansa den Dios ta e Baranca fuerte den nos bida, ta e confiansa den Dios ta trece pas y trankilidad den nos bida pasobra ta para scirbi den Isaias 26:3-4 bisando:
Lo Bo warda den pas perfecto, esun cu su pensamento ta permanece den Bo, pasobra e ta confia den Bo. Confia den Senjor pa semper, pasobra den Dios e Senjor nos tin e Baranca eterno.
E enemigo y e sistema di mundo, ta purba tur manera pa kita nos pas, dia pa dia e distraicion nan ta bira mas fuerte, pesey nos tin di perservera den cosnan di Dios, para firme riba Su palabra, hala pega mas serca Dios, kita bista for di riba hende, y fiha nos bista completamente riba Dios.
Corda bon cu e enemigo ta campeon pa pone hende contra otro, trece division den famia, trece desaster den un hogar, pero nos Dios ta e Dios di reconciliacion, Esun cu ta reconcilia nos cu Su Mes pa medio di Su Yiu Cristo Hesus. ( 2 Corintionan 5:19).
Colosensenan 3:1-2 ta bisa: Si boso a wordo lanta cu Cristo anto,sigi busca e cosnan di ariba, caminda Cristo ta sinta na man drechi di Dios. Pone boso mente riba e cosnan di ariba, y no riba e cosnan di abao.
E cosnan di abao, e cosnan di mundo, e amistad cu mundo, ta un piedra di trompica, pasobra nan no ta respeta cosnan di Dios, ora nos ta purba mescla nan dos cu otro , nos ta perde temor di Dios.
E amor pa cosnan di Dios, den un palabra bisa, nos sirbishi na Dios semper mester bay nos dilanti, pasobra esey ta identifica nos como sirbido nan di Dios, pasobra nos por wak rond y mira y contempla, cu si Dios no tabatin, nos man tene, ta ken lo a hacie pa nos.
Den Mateo 11:28 Cristo Hesus a bisa : Bin serca mi tur cu ta cansa y carga, y lo Mi duna boso sosiego, y Hesus tin rason, pasobra no tin otro caminda cu nos por deposita nos carga di bida si no ta serca Hesus.
Cristo Hesus a bisa: Ami ta e mata di wijdruif , boso ta e ramanan,esun cu keda den Mi,y Ami den dje,esey ta duna hopi fruta,pasobra separa di Mi , boso no por haci nada.( Juan 15:5).
Ban tene duro na e man di Hesus, pasobra tur ora E tey.
Sinceramente, Pastor Marcel Balootje
